ՀՀ վարչապետ Կարեն Կարապետյանը նոր առողջապահական հաստատությունների կառուցման և գործող կենտրոնների արդիականացման ներդրումային ծրագրեր մշակելիս անհրաժեշտ է համարում սահմանել նման կենտրոններին ներկայացվող պահանջները, պայմանները այդ թվում ճարտարապետական լուծումները և ֆունկցիոնալ կառուցվածքը։ «Միաժամանակ բժշկական հաստատություններին վերաբերող գործող քաղաքաշինական նորմատիվ ակտերը ընդունվել են 1989 թվականին, չեն արդիականացվել և չեն համապատասխանում միջազգային փորձում ընդունված ժամանակակից չափանիշներին ու պահանջներին, ինչպես նաև սահմանափակում են փոքր ծավալի բժշկական ծառայություններ մատուցող հաստատություններ կառուցելու հնարավորությունները»,- կառավարության նիստում ասել է Կարեն Կարապետյանը:
Հաշվի առնելով վերոնշյալը՝ վարչապետն Առողջապահության նախարարին և Քաղաքաշինության պետական կոմիտեի նախագահին հանձնարարեց 2-ամսյա ժամկետում համատեղ ուսումնասիրել և կառավարության աշխատակազմ ներկայացնել առողջապահական հաստատություններին ներկայացվող քաղաքաշինական նորմերի վերանայման, արդիականացման և միջազգային չափանիշներին համապատասխանեցմանն ուղղված առաջարկություններ։
«Մենք կառուցում ենք բժշկական հաստատություններ, որոնց հաստատուն ծախսերից դուրս գալը պրակտիկորեն անհնար է: Դրանք ունեն բարձր առաստաղներ, պահանջում են ջեռուցման համար մեծ ծախսեր. աշխարհում նման բան չկա»,- նկատեց Կարեն Կարապետյանը:
