ԱՄՆ-ում դատարանը մերժել է հեղինակների գիլդիայի հայցն ընդդեմ Google-ի՝ հաղորդում է Reuters-ը:
Նյու Յորքի շրջանային դատավոր Դենի Չինը որոշում է կայացրել դատական հայցի դեմ, որը տրվել էր 2005-ին՝ հեղինակների գիլդիայի կողմից ընդդեմ Google-ի (ինչպես նաև գրքեր սքանավորելու Google Books նախագծի դեմ):
Հեղինակների կարծիքով՝ տպագիր գրքերի պատճենումը էլեկտրոնայինի անօրինական է, քանի որ խախտվում են հեղինակային իրավունքները, և այդ ոլորտում Google-ը ձեռք է բերում մենաշնորհային դիրքեր: Որպես փոխհատուցում՝ հեղինակների կողմից պահանջվող գումարը գերազանցում էր 3 միլիարդ դոլարը:
Սակայն դատարանը որոշել է, որ Google Books-ը չի խախտում հեղինակային իրավունքները և «բարեխղճորեն օգտագործում է» գրական ստեղծագործությունները: Դատարանը հստակեցրել է, որ էլեկտրոնային գրքերը չեն ազդում տպագիր գրքերի շուկայի վրա, քանի որ Google-ը չի վաճառում թվայնացված գրքերը և հասանելիություն չի ապահովում դրանց ամբողջական տարբերակների նկատմամբ: