ԼՂՀ Ազգային ժողովի արտաքին հարաբերությունների մշտական հանձնաժողովի նախագահ Վահրամ Աթանեսյանը «Ժառանգություն» կուսակցությանը և անձամբ այդ կուսակցության նախագահ Րաֆֆի Հովհաննիսյանին կոչ է անում ձեռնպահ մնալ առանց ԼՂՀ իշխանությունների հետ համաձայնեցնելու Արցախի անկախության ճանաչման կարևորագույն հարցը քննարկելուց և միջազգայնացնելուց: Այս մասին նա ասաց «Առաջին լրատվական»-ի հետ զրույցում:
«ԼՂՀ անկախության ճանաչման հարցն այն հարցը չէ, որ այս պահին պետք է դառնա ՀՀ Ազգային ժողովի քննարկման առարկա: Ես ցավում եմ դրա համար: Ցավում եմ, որ ԱԺ կանոնակարգ օրենքը հնարավորություն է ընձեռում այս պահին անհեռանկարային և անցանկալի խնդիրը քննարկումների թեմա դարձնել: «Ժառանգություն» խմբակցության պատգամավոր Զարուհի Փոստանջյանի որոշ հուզական-հռետորական հարցադրումներ, որ ԱԺ-ում երեկ հնչեցին, ինձ համար լիովին անհասկանալի էին: Նա ո՞ւմ էր ինչ ուզում ասել: Եթե մենք միջազգային հանրությանն ուզում ենք ասել, որ չենք ճանաչել և չենք ճանաչելու որևէ հայեցակարգ, որով Արցախը կդիտվի Ադրբեջանի տարածք, ապա դա արդեն վաղուց է ասված: Ինձ համար պարզապես անհասկանալի է, թե մենք Հայաստանի կողմից ԼՂՀ ճանաչման մասին օրինագծով ինչ ենք ուզում ասել աշխարհին: Ես լիովին կիսում եմ այն պատգամավորների մտքերը, ովքեր երեկ դիմեցին Զարուհի Փոստանջյանին՝ խնդրելով պարզաբանել՝ արդյոք «Ժառանգություն» կուսակցությունը կամ անձամբ ինքը՝ պատգամավորը, ԼՂՀ ճանաչման հարց ԱԺ-ում ներկայացնելուց առաջ խորհրդակցե՞լ է ԼՂՀ իշխանությունների, քաղաքական ուժերի հասարակական շրջանակների հետ, կամ՝ ինչո՞ւ ԱԺ-ում այդ պահին չկար Արցախի քաղաքական որևէ ուժի որևէ ներկայացուցիչ»,- ասաց Վահրամ Աթանեսյանը:
ԼՂՀ Ազգային ժողովի արտաքին հարաբերությունների մշտական հանձնաժողովի նախագահի խոսքով, չի կարելի նման կարևորության համապետական, աշխարհաքաղաքական հարցն իջեցնել ԱԺ-ում քննարկման դնելու մակարդակի:
«Արցախի եվրոպական շարժում» ՀԿ-ի նախագահ Հայկ Խանումյանն էլ «Առաջին լրատվական»-ի հետ զրույցում նշեց, որ իրենք դրական են վերաբերվում Հայաստանի և աշխարհի մյուս պետությունների կողմից ԼՂՀ ճանաչման հնարավորությանը: «Մեզ համար Արցախի միացումը Հայաստանին գերնպատակ է: Մենք դա իրատեսական համարում ենք ճանաչման միջոցով:Սակայն Հայաստանի կողմիցֆ ԼՂՀ ճանաչման հարցն այսքան հաճախ ԱԺ-ում բարձրացնելն այնքան էլ ճիշտ չենք համարում: Հարկավոր է քաղաքական բոլոր ուժերի հետ կոնսենսուսի գալ և նոր միայն այդքան կարևոր հարցը մտցնել ԱԺ օրակարգ»,- ասաց նա:
Հիշեցնենք, որ «Ժառանգություն» կուսակցությունը Հայաստանի կողմից ԼՂՀ անկախության ճանաչման հերթական օրինագիծն է ներկայացրել խորհրդարան:
Հայտնի է, որ հարցի քվեարկությանը չեն մասնակցելու ՀՀԿ-ն, ԲՀԿ-ն և ՕԵԿ-ը:
