Անվտանգության հարցերով մյունխենյան համաժողովի նախագահ Վոլֆգանգ Իշինգերը Սիրիայում իրավիճակը համարում է չափազանց տագնապալի։ Այդ իրավիճակը «չափազանց արտասովոր է», քանի որ այդ հակամարտությունում ներգրավված են համաշխարհային քաղաքականության այնքան մեծ թվով դերակատարներ՝ Ռուսաստանը, ԱՄՆ-ը, Թուրքիան, Իրանը, Իսրայելը և այլն, ասել է գերմանացի դիվանագետը Deutsche Welle-ի հետ հարցազրույցում։
Առկա է ՆԱՏՕ-ի ներսում հակամատության ծագման ռիսկ, եթե դաշինքի անդամ երկրներից մեկը զինված առճակատում սկսի իր դաշնակցի դեմ, նշել է նա՝ մատնացույց անելով սիրիացի քրդերի դեմ Անկարայի կողմից անցկացվող «Ձիթենու ճյուղ» գործողության շուրջ ԱՄՆ-ի և Թուրքիայի միջև տարաձայնությունները։
Նման իրավիճակը կարող է տանել Հյուսիսատլանտյան դաշինքում ճգնաժամի, ասել է Իշինգերը՝ ընդգծելով սիրիական հակամարտության թեմայի գլխավորությունը համաժողովում։
Համաժողովի այլ կարևոր թեմաներից մեկը կլինի մինչ օրս չլուծված խնդիրը, թե ինչպես պետք է Արևմուտքը վերաբերվի Ռուսաստանին, ասել է Իշինգերը։ «Մտածե՛ք Դոնբասի մասին, մտածե՛ք Ուկրաինայի, Ղրիմի մասին։ Այդ հակամատությունները լուծված չեն, դրանց պատճառով ամեն օր մարդիկ են զոհվում»,-նշել է նա։
