Տաջիկիստանում ուսուցչուհին զրկվել է աշխատանքից այն բանի համար, որ ուսումնարանի նիստերի դահլիճում ներկա չի գտնվել նախագահ Էմոմալի Ռահմոնի տարեկան ուղերձի հեռարձակման ժամանակ։
«Դպրոցի տնօրենի կողմից ստորագրված հրամանում հենց այդպես էլ գրված է՝ «ազատել աշխատանքից՝ հրաժարվելու համար լսել ազգի առաջնորդի ուղերձը ուսումնարանի դահլիճում»– պատմել է ուսուցչուհին ռադիոներից մեկին տված հարցազրույցում։
Սաիդա Ռուստամովան, որ կոնցերտմեյստեր և պարերի ուսուցիչ էր աշխատում Դուշանբեի պարարվեստի ուսումնարանում, հավաստիացնում է, որ ձևակերպումը ճիշտ չէ։
«Երբ ես մտա դահլիճ, նստելու տեղ չկար։ Վատ մտադրություն ես չեմ ունեցել։ Պարզապես ուղերձը լսելու հնարավորություն չկար»,– ասում է նա։
«Ես բողոք եմ ներկայացրել այս կապակցությամբ նախագահի աշխատակազմին և Մշակույթի նախարարությանը։ Սպասում եմ պատասխանին»,– պատմել է Ռուստամովան։
Տաջիկիստանի Մշակույթի նախարարությունում հաստատել են, որ Ռուստամովան հեռացվել է Աշխատանքային օրենսգրքի 42 հոդվածի համաձայն՝ գործատուի նախաձեռնությամբ։ Գերատեսչությունում նաև հաստատել են, որ ստացել են աշխատանքից ազատված ուսուցչուհու բողոքը։
Տաջիկիստանի նախագահը 2017 թվականի դեկտեմբերի 22-ին իր հերթական ուղերձով դիմել է երկրի խորհրդարանին։ Բոլոր պետական ռադիո– և հեռուստաալիքները ուղիղ եթերով հեռարձակել են նախագահի ելույթը։ Իսկ բոլոր պետական հաստատությունների աշխատակիցները, ուսանողներն ու բարձր դասարանցիները պարտավոր էին լսել այդ ելույթը։
