Փետրվարի 14-ին «Թալիբան» ահաբեկչական խմբավորումը տարածել է նամակ՝ հասցեագրված ամերիկացի ժողովրդին, անկախ, ոչ կառավարական կազմակերպությունների պաշտոնատար անձանց և խաղաղասեր կոնգրեսականներին՝ Աֆղանստանում պատերազմի դադարեցմանն ուղղված երկխոսության առաջարկով։ Այս մասին հայտնում է Reuters գործակալությունը։
Դրա հետ մեկտեղ գրոհայինները նախազգուշացրել են, որ խաղաղության հարցում իրենց պատրաստակամությունը չի նշանակում խմբավորման թուլացում։
«Մենք նախապատվություն ենք տալիս աֆղանական հարցը խաղաղ երկխոսության ուղիով լուծելուն»,-գրել են նրանք՝ հավելելով, որ ԱՄՆ-ը պետք է դադարեցնի իր օկուպացիան և ընդունի կառավարության ձևավորման «Թալիբանի» իրավունքը՝ համահունչ «մեր ժողովրդի համոզմունքների»։
«Ամերիկացի ժողովդի համար դեռևս չափազանց ուշ չէ գիտակցել, որ «Թալիբանը» կարող է լուծել խնդիրները յուրաքանչյուր կողմի հետ առողջ քաղաքականության ու երկխոսության ուղիով»,-ընդգծել են թալիբները։
Նրանք նաև նշել են, որ աֆղանական պատերազմն ամենատևական հակամարտությունն է, որում ներգրավված է ԱՄՆ-ը։ Այն շարունակվում է արդեն 17 տարի և արժեցել է տրիլիոնավոր դոլարներ։
