Ինչպես հայտնի է՝ ԱԺ չորս խմբակցություններ` ԲՀԿ-ն, ՀԱԿ-ը, ՀՅԴ-ն, «Ժառանգությունը» և անկախ պատգամավորներ Խաչատուր Քոքոբելյանն ու Էդմոն Մարուքյանը նոյեմբերի 15-ին ժամը 12-ին արտահերթ նիստ են հրավիրել` պարտադիր կուտակային համակարգի քաղաքականությունը քննարկելու համար:
«Առաջին լրատվական»-ի հարցին` հնարավո՞ր է արդյոք որևէ փոփոխություն լինի և կուտակայինին անցնելու որոշումը փոխվի, աշխատանքի և սոցապ նախարար Արտեմ Ասատրյանը պատասխանեց. «Չեմ կարծում: Այդ որոշումները կայացվել են սրանից երեք տարի առաջ, երբ ԱԺ-ի կողմից ընդունվեց շուրջ 50 օրենքից բաղկացած օրենքների նախագծերի փաթեթ, որով սահմանվեց նոր կենսաթոշակային համակարգը»:
Նոյեմբերի 11-ին «Ընդդեմ կենսաթոշակային պարտադիր վճարների» նախաձեռնությունը բաց նամակով դիմել էր ԱԺ պատգամավորներ Հրանտ Բագրատյանին, Նիկոլ Փաշինյանին, Լևոն Զուրաբյանին, Արծվիկ Մինասյանին, Նաիրա Զոհրաբյանին, ինչպես նաև մի շարք այլ պատգամավորների՝ Կուտակային կենսաթոշակների մասին օրենքի պարտադիրության սկզբունքն անվավեր ճանաչելու համար ԱԺ արտահերթ նիստ հրավիրելու և սահմանադրական դատարան դիմելու նպատակով ստորագրահավաք նախաձեռնելու վերաբերյալ:
