Ամերիաբանկը հայտարարում է մրցույթ՝ «Ես ազատ եմ» թեմայով, որը յուրաքանչյուր անհատի հնարավորություն է ընձեռում ինքնուրույն սահմանել, թե ինչ է ազատությունն իր համար, և ազատորեն արտահայտել սեփական պատկերացումները, ցանկությունները, նպատակներն ազատության վերաբերյալ:
Ամերիաբանկի զարգացման գծով տնօրեն Տիգրան Ջրբաշյանը նշեց, որ մրցույթը կտևի մեկ ամիս՝ նոյեմբերի 13-ից դեկտեմբերի 13-ը: «Կարևորելով ազատության դերը յուրաքանչյուր մարդու կյանքում, նրա ձգտումներում, գործողություններում՝ Ամերիաբանկը «Ավելին իրագործելու ազատություն» կարգախոսի ներքո առաջարկում է այնպիսի գործընկերային հարաբերություններ, որոնք հաճախորդին հնարավորություն են տալիս ազատ արտահայտելու և իրագործելու իր ցանկությունները: Ազատ է մարդը, ում հնարավորություն է ընձեռվում հանգիստ պայմաններում կարդալ որևէ գիրք, այդ կարդալու ընթացքը գուցեև իր համար ազատության սահմանում է: Մրցույթի ուղղվածությունը ոչ թե քաղաքական և այլ ազատությունն է, այլ մարդկային, որովհետև մենք այսօր կառավարում ենք հաճախորդների ազատությունը»,- ասաց նա:
Մրցույթին մասնակցելու համար անհրաժեշտ է www.esazatem.am կայքում վերբեռնել մրցույթի պայմաններին բավարարող թվային լուսանկար կամ տեսանյութ (լուսանկարները պետք է վերբեռնել նաև «Ֆեյսբուք» սոցիալական ցանցում գրանցված «Ամերիաբանկ» ՓԲԸ պաշտոնական էջում):
Ջրբաշյանի խոսքով՝ մրցույթին ներկայացված բոլոր լուսանկարները և տեսանյութերը կանցնեն առաջնային դիտարկում, որի ժամանակ կստուգվի դրանց համապատասխանությունը մրցույթի պայմաններին: Եթե լուսանկարը կամ տեսանյութը համապատասխանի այդ պայմաններին, ապա այն իր տեղը կգտնի Facebook սոցիալական ցանցում ներկայացված Ամերիաբանկի պաշտոնական էջում՝ շաբաթական թողարկումներով, տեսանյութերը կտեղադրվեն նաև YօuTube-ի Ամերիաբանկի պաշտոնական ալիքում:
Մրցույթի արդյունքները կամփոփվեն երկու փուլով, և հաղթողները կորոշվեն «Ֆեյսբուք» սոցիալական ցանցում Հայաստանի տարածքի օգտատերերի Like-երի և Ամերիաբանկի աշխատակիցների քվեարկության արդյունքներով: Հաղթող կճանաչվեն առավելագույն ձայներ ստացած երեք լուսանկարը և երեք տեսանյութը՝ արժանանալով համապատասխանաբար առաջին, երկրորդ և երրորդ կարգի մրցանակների: Արդյունքները կհրապարակվեն մրցույթի ավարտից մեկ աշխատանքային շաբաթ հետո:
Ամերիաբանկի տնօրենի խոսքով՝ մրցույթին կարող է մասնակցել ցանկացած անձ՝ առանց տարիքային սահմանափակման, սակայն մեզ համար թիրախային խումբը 18-35 տարեկաններ են: Նա նշեց, որ նմանատիպ մրցույթներով փորձում են ճիշտ դիրքավորվել շուկայում: Նախորդ արշավը, ըստ Ջրբաշյանի, բավական հետաքրքիր դիրքավորում տվեց իրենց:
«Երբ ՓՄՁ-ներին հարցնում են՝ որ բանկին կդիմեք, մենք առնվազն առաջին եռյակում ենք. որոշ համայնքներում առաջին տեղում ենք, որոշներում՝ երկրորդ»,- ասաց նա:
Ջրբաշյանը նշեց, որ հաղթողների համար մրցանակները սահմանված են, բայց իրենք դեռ գաղտնի են պահում, սակայն մի բան միանշանակ է՝ դրանք աննախադեպ են լինելու: Նա ասաց, որ այս «գաղտնիությունը» ևս արշավի տարրերից է, PR տեխնոլոգիա:
Լուսանկարը՝ PanARMENIAN Photo-ի
