Արդյո՞ք նոյեմբերի 5-ից հետո Հայաստանում հեղափոխական իրավիճակ է ստեղծվել, և արդյո՞ք այն կարող է իրական հեղափոխական գործողությունների հանգեցնել: Մշակութային մարդաբան Աղասի Թադևոսյանի համոզմամբ՝ հեղափոխական իրավիճակ չի ստեղծվել և չի ստեղծվել այն պարզ պատճառով, որ Հայաստանում դրա կրողների կրիտիկական զանգվածը չկա. կան մարդիկ, ովքեր քանակապես քիչ են, դրա համար հասարակական ռեզոնանս տեղի չի ունենում:
Նրա խոսքով՝ մեր հասարակությունը հեղափոխական չէ, պահպանողական է, իսկ պահպանողական հասարակությունները սովորաբար չեն անում հեղափոխություններ: Ըստ նրա՝ հեղափոխություն անելու համար մարդիկ պետք է միշտ ձգտեն փոխել իրենց արժեքները, իրենց պատկերացումները աշխարհի, կյանքի մասին, իրենց պրակտիկաները, տեքստերը, իսկ մեր հասարակությունը ձգտում է ավանդական շրջանի արժեքներին, իսկ այն մարդիկ, ովքեր ավելի շատ հակված են նորության, թարմության, նրանք ստանում են տարբեր տեսակի պիտակավորումներ:
Աղասի Թադևոսյանի խոսքով՝ հեղափոխական գաղափարները և դրանք իրականացնողներն առաջանում են հենց «նորույթային մտածողություն ունեցող մարդկանց միջավայրում, բայց այդպիսի հասարակությունում պետք է լինի բավականաչափ ռեսուրս, որը կարող է մղել դեպի առաջ՝ աջակցելու նրանց իր մտքերի, գաղափաների մեջ և այդ գաղափարներից բխող գործողությունների մեջ»:
Իսկ Շանթ Հարությունյանի արածը, մեր զրուցակցի դիտարկմամբ, բունտ էր, բողոք էր՝ իշխող համակարգի դեմ, բայց հեղափոխություն չէր: «Այս ճգնաժամային վիճակում նման բունտային տրամադրություններ շատ կան, և Շանթը իր խմբի հետ պարզապես այդ տրամադրությունը վերածեց գործողության: Ենթադրում եմ՝ ցույց տալու համար, որ այսպես ապրել այլևս չի կարելի»,- ասաց Աղասի Թադևոսյանը:
Նրա խոսքով՝ հեղափոխությունը պետք է մարդկանց մեջ լինի, որ մարդիկ էլ փորձեն փոխել իրենց միջավայրը հեղափոխականորեն, բայց եթե մարդկանց գլխներում չկա վերափոխվելու գաղափարներ, ձգտումներ, բնականաբար՝ միջավայրը վերափոխելու գաղափարները, ձգտումները ևս ակտիվ չեն կարող լինել հասարակությունում:
«Մեր հասարակությունն այն տիպի հասարակություն չէ, որ ձգտում է վերափոխվել, ընդհակառակը՝ ինքն իր գոյատևման, պահպանման, միշտ միևնույն կետում մնացող հասարակություն է»,- ասաց նա՝ հավելելով, որ անիմաստ իշխանափոխություն մեզ պետք չէ, մեզ պետք է իշխանության որակի փոփոխություն:
«Ինձ համար՝ անկեղծ ասած, թե ով կփոխի այդ իշխանության որակը, էական չէ: Դա կանի իշխանությունն իր ներսից կամ դրսից, էական չէ: Էականը որակի փոփոխությունն է, այնպիսի որակի, որը կսկսի վարել այնպիսի քաղաքականություն, որ երկիրը կտանի դեպի զարգացման, այլ ոչ թե գոյատևման՝ յոլա գնալու իրավիճակում պահելով ընդհանուր հասարակությանը»,- ասաց Աղասի Թադևոսյանը:
Լուսանկարը՝ Photolure-ի
