Ժողովրդական կուսակցության նախագահ Տիգրան Կարապետյանն այսօր լրագրողների հետ հանդիպմանը խոսեց Հայաստանի ներքին և արտաքին խնդիրներից: Նա նորից պնդեց իր այն տեսակետը, որ Հայաստանում ամեն ինչ սարսափելի ծանր է, ազգը կործանվում է. «Ես հասկանում եմ, որ Սիրիայից փախչում են, այնտեղ պատերազմ է, բայց սեփական երկրից մարդ ինչո՞ւ պիտի փախչի»:
Նրա հավաստմամբ՝ ամեն ինչ անում են, որ մարդիկ պարտքերի տակ ընկնեն, վարկեր մուծեն և չկարողանան ապրել, սակայն նա չի հասկանում, թե աղքատ խավը հույսը ինչի՞ վրա է դրել, որ դուրս չի գալիս պայքարելու:
Ինչ վերաբերում է քաղաքական գործընթացներին, ապա նրա կարծիքով՝ որևէ լուրջ գործոն չկա այս դաշտում, Հայաստանում անգամ ընդդիմություն չկա. «Յուրաքանչյուր ընդդիմադիր օգտվում է իշխանության կերակրատաշտից: Եթե անգամ բարձրագոչ ճառեր են ասում, միևնույն է՝ թիկունքում համագործակցում են: Ով իրենց հետ չէ՝ պատժվում է, և փորձ է արվում քշել հանրապետությունից»:
Տիգրան Կարապետյանն անդրադարձավ Շանթ Հարությունյանին՝ նշելով, որ շատ է ափսոսում նրա համար. «Անդուր բան արեցին, բայց պոռթկումը մաքուր էր: Ես չեմ համարում, որ Շանթի գործոնը փոքր էր, մեծ էր կամ սխալ, բայց եթե չլինի մի պոռթկում, չի լինի մյուսը»:
Հայաստանի՝ Մաքսային միությանը միանալու վերաբերյալ էլ նա ընդգծեց, որ քար ենք նետում Ռուսաստանի դաշտը:
Լուսանկարը՝ PanARMENIAN Photo-ի
