Հանրապետական կուսակցության նախագահի թեկնածու, ներկայումս Մեծ Բրիտանիայում Հայաստանի դեսպան Արմեն Սարգսյանը երկօրյա այցով մեկնել էր Լեռնային Ղարաբաղ։ Առաջադրվելու հարցում իր վերջնական որոշումը կայացնելու համար նա նախագահ Սերժ Սարգսյանից ժամանակ էր խնդրել՝ ցանկանալով հանդիպել քաղաքական ուժերին, մտավորականներին, Սփյուռքի ներկայացուցիչներին ու Լեռնային Ղարաբաղի ղեկավարությանը։ Պաշտոնական Ստեփանակերտը դրական է համարում նախագահի պաշտոնում Արմեն Սարգսյանի թեկնածությունն ու կարծում, որ ընտրվելու դեպքում նա կարող է մեծ օգուտ բերել Լեռնային Ղարաբաղի կարգավորման հարցում։ Թեև Արցախի նախագահ Բակո Սահակյանի խոսնակ Դավիթ Բաբայանը հայտարարել է, որ պարտադիր չէ, որ վերջինս պաշտոնապես մասնակցի բանակցություններին, կարող է խորհուրդներ տալ ու գործուն մասնակցություն ունենալ քննարկումներին։ Կարո՞ղ է Արմեն Սարգսյանը անել մի բան, որը մինչ այժմ հնարավոր չի եղել անել, և վերջինիս անձնական կապերը արդյո՞ք բավարար են Արցախին, արցախյան կարգավորմանը օգտակար լինելու համար։ Թեման «Առաջին լրատվական»-ի տաղավարում քննարկելու ենք Արցախի նախագահ Բակո Սահակյանի խորհրդական Գառնիկ Իսագուլյանի հետ։