Google-ի Android օպերացիոն համակարգը ճնշում է Apple-ի iOS-ին: IDC վերլուծական ընկերության տվյալներով՝ երրորդ եռամսյակում վաճառված 5 սմարթֆոններից 4-ն աշխատել են այս օպերացիոն համակարգով: Այս մասին հայտնում է Vesti-ն:
Ընդհանուր առմամբ դիտարկվող եռամսյակում վաճառվել է 211.6 մլն սմարթֆոն: Դրանց 81 տոկոսը բաժին է ընկել Android ՕՀ-ով աշխատող սարքերին, իսկ 12.1 տոկոսը՝ iOS-ին: Windows Phone ՕՀ-ով սարքերը միայն սահմանափակ պահանջարկ ունեն և շուկայում 3.6 տոկոս են կազմում, սակայն այդ օպերացիոն հարթակի ժողովրդականության աճն ակնարկում է, որ իրավիճակը կարող է փոխվել հօգուտ նրա: Անցած տարվա նույն ժամանակահատվածի համեմատ երրորդ եռամսյակում վաճառվել է 156 տոկոսով ավելի Windows Phone սարք:
Իսկ ահա Blackberry-ն կյանքի նշաններ ցույց չի տալիս: Կանադական ընկերության օպերացիոն համակարգը 1.7 տոկոսի վաճառք է գրանցել: Սա վատագույն ցուցանիշն է Blackberry-ի ողջ պատմության մեջ:
