Վերահսկիչ պալատի նախագահի ընտրություններին ԱԺ ՀՅԴ խմբակցությունը, հավատարիմ մնալով խոստմանը, չմասնակցեց: Նույն կերպ քվեարկությանը ներկա չէին ՀԱԿ խմբակցության որոշ անդամներ՝ հաշվի առնելով Գլխավոր դատախազի ընտրության ժամանակ տեղի ունեցածը: ՀԱԿ պատգամավոր Հրանտ Բագրատյանն ու Նիկոլ Փաշինյանը, սակայն, մասնակցեցին քվեարկությանը։ Ու թեև Հաշվիչ հանձնաժողովի նախագահ Սուքիաս Ավետիսյանն անընդհատ շեշտում էր՝ պարոն Փաշինյան, այս անգամ է՞լ եք նկարելու, ՀԱԿ պատգամավորն ամեն դեպքում լուսանկարել էր իր քվեաթերթիկը. քվեախցից նա դուրս եկավ հեռախոսը միացրած: Հարցին՝ քվեաթերթիկը նկարելու կարիք կա՞ արդյոք, Փաշինյանը պարզապես ժպիտով պատասխանեց:
Լրագրողների հետ զրույցում Փաշինյանը նշեց, թե քվեարկությանը չմասնակցելու ՀԱԿ որոշմանը հարգանքով է վերաբերվում, բայց նաև հավատարիմ է մնում իր սկզբունքներին։
Խմբակցության մեկ այլ պատգամավոր՝ Հրանտ Բագրատյանը, զարմացավ. «Այս պահին ի՞նչ կապ ունի ՀԱԿ-ն ինձ հետ: Ես որոշել եմ քվեարկել»: Նա հրաժարվեց պատասխանել, թե ինչպես է քվեարկել։
