2018 թվականի փետրվարի 07-ին՝ ժամը 13:50-ի սահմաններում, N զորամասի պահպանության շրջանի մարտական դիրքի ուղղությամբ հակառակորդի կողմից արձակած կրակոցի հետևանքով գլխի շրջանում հրազենային վիրավորում է ստացել պարտադիր ժամկետային զինծառայող, շարքային Հայկ Քալանթարյանը: Վերջինս տեղափոխվել է զինհոսպիտալ, որտեղ ժամը 19:10-ին մահացել է: Ադրբեջանի մարտավարությունը մնում է անփոփոխ` առաջնագծում հարուցել լարվածություն, երբ կարգավորման գործընթացում տեղի են ունենում զարգացումներ:
Հենց երեկ Բաքվում էին ԵԱՀԿ Մինսկի համանախագահները, որոնք տարածաշրջանում են` հակամարտության կողմերի հետ Նալբանդյան-Մամեդյարով կրակովյան պայմանավորվածությունները քննարկելու նպատակով: Խոսքը մասնավորապես վերաբերվում է ԵԱՀԿ գործող նախագահի անձնական ներկայացուցչի գրասենյակի ռեսուրսների ավելացմանը: Սա առաջնագծում վստահության մեխանիզմների ներդրման լոկալ դրսևորում է, ինչը համարժեք չէ Վիեննայի և Սանկտ Պետերբուրգի համաձայնություններին, այնուամենայնիվ, փոքր, սակայն տեսանելի առաջընթաց է:
Համանախագահության այցի ֆոնին Ադրբեջանի կազմակերպած հերթական սադրանքը հուշում է, որ Բաքուն մտադիր է վիժեցնել անգամ Կրակովի պայմանավորվածությունները կամ առնվազն առաջ քաշել նոր նախապայմաններ` դրանց կատարման դիմաց: Մեծ հաշվով` Իլհամ Ալիևի իշխանությունը հայտնվել է փակուղային իրավիճակում և նման սադրանքներով փորձում է ճնշում գործադրել համանախագահների վրա և խուճապ առաջացնել Հայաստանում: Ադրբեջանն, ըստ էության, չունի նոր պատերազմ սանձազերծելու միջազգային լեգիտիմություն:
Բաքուն հույսը չի կարող դնել անգամ Անկարայի աջակցության վրա, որի միջազգային մեկուսացումն ավելի է խորացել սիրական ռազմական կամպանիայի հետևանքով: Այս համատեքստում Ադրբեջանը շեշտը դրել է հոգեմաշ պատերազմի մարտավարության վրա, որն իսկապես, զուտ հոգեբանական հարթության վրա, ավելի ճնշող ազդեցություն է ունենում մեր հասարակության վրա, քան` լայնածավալ պատերազմը:
Մի քանի օր առաջ Սերժ Սարգսյանը ԱԳՆ-ում, ըստ էության, ձևակերպել էր հայկական դիվանագիտությունը որակական նոր մակարդակի վրա կառուցելու խնդիր:
Կարծում ենք` Երևանը Բաքվի սադրանքներին պետք է պատասխանի ոչ ստանդարտ քայլերով, որոնք միտված պետք է լինեն Ադրբեջանի միջազգային մեկուսացման խորացմանը` նպատակ ունենալով սահմանափակել հակառակորդի դիվանագիտական մանևրի և ռազմա-տեխնիկական համագործակցության ռոսուրսը:
