Այսօր սկսվում է Ադրբեջանի նախագահ Իլհամ Ալիևի պաշտոնական այցը Թուրքիա: Նրա ծրագիրը շատ հագեցած է. երկօրյա այցի ընթացքում տեղի կունենան պաշտոնական հանդիպումներ Թուրքիայի նախագահ Աբդուլլահ Գյուլի և վարչապետ Ռեջեփ Թայիփ Էրդողանի հետ: Կողմերը մտադիր են քննարկել երկու երկրներին հետաքրքրող համալիր հարցեր, ստորագրել պայմանագրեր ու արձանագրոթյուններ տարբեր ոլորտներում համագործակցության շրջանակում, քննարկումներ անցկացնել տարածաշրջանային և միջազգայն խնդիրների շուրջ:
Ավանդույթի համաձայն՝ Ադրբեջանի վերընտրված նախագահն առաջին պաշտոնական այցը կատարում է Թուրքիա: Այդ ավանդույթին արդեն երրորդ անգամ հետևում է նաև Իլհամ Ալիևը, ով եղբայրական հարաբերություններ է հաստատել թուրք գործընկերոջ և վարչապետի հետ:
Այդ միջանձնային և միջպետական հարաբերությունների թագն է դարձել 2010 թվականի սեպտեմբերին Թուրքիայի և Ադրբեջանի ռազմավարական համագործակցության գերագույն խորհրդի ստեղծման մասին համաձայնագրի ստորագրումը:
Ադրբեջանի փոխարտգործնախարար Արազ Ազիմովի խոսքով՝ այդ համաձայնագիրն արտացոլում է ռազմավարական նշանակություն ունեցող շատ հարցեր: «Այն բարձրացրել է երկու երկրների հարաբերությունների մակարդակը արտակարգ իրավիճակներում կամ ճգնաժամային շրջանում փոխօգնության հարցում»: Այդ փաստաթղթի գլխավոր բաղադրիչը երկու երկրներից մեկի անվտանգության ուղիղ սպառնալիքի դեպքում միմյանց աջակցելու պարտավորությունն է:
Այդ այցի շրջանակում Ալիևի և Էրդողանի նախագահությամբ կանցկացվի խորհրդի երրորդ հանդիպումը: Տեղի վերլուծաբանների կարծիքով՝ հանդիպման գլխավոր թեման կլինեն տարածաշրջանային քաղաքա-տնտեսական հարցերը, մասնավորապես կողմերը կքննարկեն հայ-ադրբեջանական հակամարտության կարգավորման խնդիրը:
Այդ հարցը սկզբունքային նշանակություն ունի երկու երկրների համար: Ղարաբաղյան խնդրի լուծման հետ են կապվում Հայաստանի հետ Թուրքիայի սահմանի բացումն ու դիվանագիտական հարաբերությունների հաստատումը: Այդ մասին օրերս հերթական անգամ հայտարարել է Թուրքիայի արտգործնախարար Ահմեդ Դավութօղլուն՝ նշելով, որ Անկարան պատրաստ է թեկուզ վաղը բացել սահմանը, եթե այն վերացնի տարածաշրջանային խաղաղության գլխավոր պատճառը:
«Նեզավիսիմայա գազետան» նշում է, որ սա ակնհայտ «մեսիջ» էր Երևանին՝ ԵԱՀԿ Մինսկի խմբի հովանու ներքո այս ամսվա վերջին Հայաստանի ու Ադրբեջանի նախագահների սպասվող հանդիպման նախաշեմին:
Ինչ վերաբերում է բանակցությունների տնտեսական մասին, ապա փորձագետների կարծիքով՝ կքննարկվեն անդրանատոլիական գազատարի իրականացման հարցերը, Բաքու-Թբիլիսի-Կարս երկաթուղու շինարարության ավարտը, ինչպես նաև Թուրքիայի էներգետիկ ոլորտում Ադրբեջանի ներդրումները:
Սպասվում է, որ Թուրքիայի նախագահն ադրբեջանցի գործընկերոջը կշնորհի պետական շքանշան:
