«Բաց հասարակության հիմնադրամ-Հայաստան» կազմակերպությունը եռօրյա միջազգային համաժողով է իրականացնում «Պալեատիվ կամ ցավամոքիչ խնամքի նորագույն զարգացումներն աշխարհում» թեմայով:
ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանի խոսքով՝ այս տարի կարողացել են հասնել նրան, որ Պալեատիվ խնամքի մասին օրինագիծն ընդունվի, և օրինագիծն առաջին ընթերցմամբ արդեն ընդունվել է: Խոսելով համաժողովի կարևորությունից՝ նա նշեց, որ կարևոր է տարբեր երկրների մասնագետների փորձը, և համաժողովն այդ առումով մեծ հնարավորություն է ստեղծում ծանոթանալու միջազգային փորձին: Արա Բաբլոյանը կարևորեց նաև այդ մասնագետների թվի աճը:
Հայաստանում արձանագրվող տարեկան մահվան դեպքերի ընդհանուր թվի` 27.000-28.000-ի մոտ 60-70 տոկոսին անհրաժեշտ է լինում ցավամոքիչ խնամք: Հայաստանում ամեն օր ցավամոքիչ խնամքի կարիք ունի մոտ 3000 մարդ: Ցավամոքիչ խնամքի մոտեցումներով բարելավվում է կյանքին սպառնացող հիվանդությունների հետ կապված խնդիրներ ունեցող հիվանդների և նրանց ընտանիքի անդամների կյանքի որակը` ցավի և ֆիզիկական, հոգեսոցիալական և այլ խնդիրների վաղ հայտնաբերման և ճշգրիտ գնահատման ու խնամքի միջոցով տառապանքը կանխելու և մեղմելու ճանապարհով:
Վաշինգտոնի պալեատիվ օգնության հարցերով ԲՀԻ-ի միջազգային խորհրդատու, գիտությունների դոկտոր Ստեֆեն Քոնորն էլ նշեց, որ ամեն շաբաթ աշխարհում մեկ միլիոն մարդ մահանում է, ընդ որում՝ նրանց 80 տոկոսը մահանում է առանց պալեատիվ խնամք ստանալու: Նա նշել է, որ Հայաստանում բավական մեծ են այն ընտանիքների թիվը, ովքեր ունեն պալեատիվ խնամքի կարիք:
Պալեատիվ խնամքն ավելի շատ տարածված է ԵՄ-ում և ԱՄՆ-ում՝ շուրջ 80 տոկոսով: Պարզվել է, որ Հայաստանում 18.000 մարդու անհրաժեշտ է պալեատիվ կամ ցավամոքիչ խնամք: Ուսումնասիրությունները նաև ցույց են տվել, որ Հայաստանում մեկ երրորդը տառապում է քաղցկեղով: Այսօր կա պալեատիվ խնամք իրականացնող 60 խմբի կարիք:
Լուսանկարը՝ PanARMENIAN Photo-ի
