Այս շաբաթ Ստրասբուրգում Եվրախորհրդարանի պատգամավորները պետք է որոշեն, թե ինչպես օգտագործել 73 մանդատները, որոնք կազատվեն ԵՄ-ից Մեծ Բրիտանիայի դուրս գալուց հետո։ Առաջարկվող տարբերակը հետևյալն է՝ բաժանել տեղերի մի մասն առանձին երկրների միջև, մյուս մասը՝ անդրազգային ցուցակների միջոցով խաղարկել եվրոպական քաղաքական կուսակցությունների միջև։
Համաձայն Լոնդոնի և Բրյուսելի միջև բանակցային պլանի՝ Մեծ Բրիտանիան պետք է պաշտոնապես դադարեցնի եվրաանդամակցությունը 2019 թվականի գարնանը։ Եվրախորհրդարանի հերթական ընտրություները նշանակված են նույն տարվա հունիսի սկզբին։
Լուծման նախագիծը, որը պատրաստվել է լիագումար նիստում դիտարկման համար, նախատեսում է կիսել 27 տեղերը 14 երկրների միջև, որոնք այժմ ունեն Եվրախորհրդարանում անհամաչափ փոքր ներկայացուցչությունը (մանդատների թիվը կախված է երկրի բնակչության թվաքանակից)։ Հավելյալ 5-ական մանդատ կստանան Ֆրանսիան և Իսպանիան, 3-ական՝ Իտալիան և Նիդերլանդները, 2 նոր տեղերը կտան Իռլանդիային։ 1-ական պատգամավորով կավելանան Լեհաստանի, Ռումինիայի, Շվեդիայի, Ավստրիայի, Դանիայի, Սլովակիայի, Ֆինլանդիայի, Խորվաթիայի և Էստոնիայի ներկայացուցչությունները։
Առավել մեծ հարցեր է առաջացնում մնացած 46 տեղերի ճակատագիրը։ Դրանց մի մասը ծրագրվում է պահել ԵՄ ապագա անդամների համար, մնացածը (ենթադրվում է՝27 տեղ) դնել համաեվրոպական ընտրությունների։
Այդ դեպքում Եվրախորհրդարանի ընտրություններում ընտրողները կունենան 2-ական ձայն, որից մեկը, նախկինի պես, կարելի կլինի տալ ազգային կուսակցության ցուցակին, իսկ երկրորդը՝ համաեվրոպական կուսակցության թեկնածուներին։
