Վերահսկիչ պալատի նախագահի թեկնածու, նախագահ Սերժ Սարգսյանի կողմից առաջադրված Իշխան Զաքարյանը, շրջանառվող լուրերի համաձայն, առաջադրման համար քիչ ջանքեր չի թափել. հանդիպել է ԱԺ մի շարք պատգամավորների հետ:
Վերջին շրջանում լրատվամիջոցների ուշադրությունն էր գրավել նրա հանդիպումն ԱԺ ՀՀԿ խմբակցության պատգամավոր Մհեր Սեդրակյանի հետ՝ նրա առանձնասենյակում: Նոյեմբերի 11-ին ԱԺ-ում լրագրողները Սեդրակյանից հետաքրքրվեցին՝ իրականությանը համապատասխանո՞ւմ են լուրերը, որ նա միջնորդել է Իշխան Զաքարյանի թեկնածության առաջադրման հարցում: Ի պատասխան՝ Մ. Սեդրակյանը նախ հրաժարվեց հարցերին պատասխանել՝ պատճառաբանելով, որ գործընկեր պատգամավորները նեղանում են իրենից:
«Ես չեմ ուզում հարցերի պատասխանել, որովհետև ինձ չի կարելի հարց տալ, բոլորը նեղանում են ինձանից: Ինձ մի՛ հարցրեք, էլի, ղեկավար կա, ուրիշ պատգամավորներ կան: Երբ բոլոր պատգամավորներին հարցեր կտաք, կհավասարվենք, կգաք, ինձ էլ կտաք, թե չէ՝ նեղանում են, ասում են՝ սաղ տեղերը քո հարցազրույցն ա»,- ասաց նա: «Նեղացող» պատգամավորների անունները, սակայն, Սեդրակյանն այդպես էլ չնշեց:
Լուսանկարը՝ Panorama.am-ի
