Թեև այս տարի տնտեսական աճը չի հասնելու նախանշած 7 տոկոսին, այնուամենայնիվ, կառավարությունում հրաժարականներ չեն լինելու, և վարչապետ Տիգրան Սարգսյանը շարունակելու է պաշտոնավարել: «Առաջին լրատվական»-ի տեղեկությունների համաձայն՝ այդ մասին անցած շաբաթ ակնարկել է Սերժ Սարգսյանը Հանրապետական կուսակցության թե՛ գործադիր մարմնի, և թե՛ խորհրդի նիստի ժամանակ, որոնք տեղի են ունեցել իրար հետևից:
Հիշեցնենք, որ Սերժ Սարգսյանը տարեսկզբին հայտարարել էր, թե կառավարության առաջ խնդիր է դրված ապահովել 7 տոկոս տնտեսական աճ, իսկ եթե չապահովի, պետք է հրաժարական տա: Եվ Տ.Սարգսյանի հրաժարականին սպասող որոշ քաղաքական ուժերն ու պաշտոնյաները անցած ամիսներին հույս են ունեցել, որ այս տարի վարչապետի փոփոխություն կլինի: Ինչպես հայտնի է, այդ նիստերի ժամանակ քննարկվել է 2014թ. բյուջեի նախագիծը, որը հաջորդ շաբաթ պետք է քննարկվի Ազգային ժողովի արդեն լիագումար նիստերում:
Իսկ կուսակցական այդ քննարկումների ժամանակ Ս.Սարգսյանը թեև ափսոսանք է հայտնել, որ տնտեսական աճը իրենց սպասած 7 տոկոսի չափով չի լինում, սակայն ասել է, որ կփորձեն բացը լրացնել հաջորդ տարի: Եվ ՀՀԿ խորհրդի անդամների փոխանցմամբ այդ նիստի ժամանակ նա ընդգծված ակտիվ երկխոսության մեջ է եղել Տ.Սարգսյանի հետ և անընդհատ նրան ինչ-որ քննարկումների մեջ է ներգրավել: Իսկ այդ վերաբերմունքից ներկաներին հասկանալի է դարձել, որ վարչապետի փոփոխություն չի նախատեսվում:
ՀՀԿ խորհրդի անդամների փոխանցմամբ՝ Ս.Սարգսյանի այդ վերաբերմունքից ակնհայտ մտահոգությունների մեջ է ընկել Ազգային ժողովի նախագահ Հովիկ Աբրահամյանը, որը չի արժանացել նմանատիպ վերաբերմունքի: Բացի դրանից՝ նա հույս է ունեցել, թե նախագահը գոնե այս աշնանը վարչապետ կփոխի, և գուցե ԲՀԿ-ի ու ՀՀԿ-ի՝ իր ազդեցության տակ գտնվող գործիչների ճնշման ազդեցությամբ փոխարենը իրեն նշանակի: Սակայն անցած շաբաթվա այդ նիստից հետո նա հասկացել է, որ Ս.Սարգսյանը վարչապետ փոխելու մտադրություն չունի, առավել ևս՝ այդ պաշտոնում իրեն չի նշանակի:
Ինչպես հայտնի է, այդ նիստի ժամանակ քննարկվել է նաև եկող տարվա կեսին պետական համակարգում աշխատավարձերի բարձրացման թեման, որը ԱԺ վերջին նիստերին սուր քննադատության է արժանացել ոչ միայն ընդդիմադիր, այլև ՀՀԿ-ական պատգամավորների կողմից: Հիշեցնենք, որ այդ ծրագրի համաձայն՝ պատգամավորների աշխատավարձը եկող տարի դառնալու է 661 հազար դրամ, իսկ նախարարներինը՝ 793 հազար դրամ: Պատգամավորները քննադատում էին, թե աշխատավարձերի բարձրացման հարցում ինչու չի պահպանվել Սահմանադրությամբ նախատեսված իշխանական հիերարխիան, և ԱԺ նախագահի աշխատավարձը վարչապետի աշխատավարձից ինչու բարձր չի սահմանվել: Չէ՞ որ ՀՀ Սահմանադրության համաձայն՝ Գործադիր մարմինը հետևում է Օրենսդիր մարմնին:
Մեր տեղեկություններով՝ Ս.Սարգսյանը ներկաներին հայտարարել է, որ ինքը համաձայն է եղել նոր սահմանված աշխատավարձերին, և բացատրել է, որ այդպիսի քայլի են գնացել, քանի որ գործադիր մարմնում աշխատող պաշտոնյաները պատգամավորների համեմատ ավելի բարձր զբաղվածություն ունեն: Եվ հարց բարձրացող հանրապետական պատգամավորներն անակնկալի են եկել Ս.Սարգսյանի այդ հայտարարությունից, քանի որ մինչ այդ համոզված են եղել, թե նա այդ մանրամասներին այնքան էլ տեղյակ չէ:
