Դեկտեմբերի 15-ին ՀՀ Սահմանադրության փոփոխությունների նախնական տարբերակը պետք է ավարտված լինի: Այդ մասին երեկ «Առաջին լրատվական»-ի թղթակցի հետ զրույցում ասաց արդարադատության նախկին նախարար, ՀՀ սահմանադրական բարեփոխումների մասնագիտական հանձնաժողովի անդամ Գևորգ Դանիելյանը: Նրա խոսքերով՝ այդ նախագիծը կքննարկվի հանձնախմբի բոլոր անդամներով ու այն կներկայացվի հաջորդ փուլին: Թե հաջորդ փուլը որն է՝ պարոն Դանիելյանը չցանկացավ մանրամասնել:
Հիշեցնենք, որ սահմանադրական բարեփոխումների նախագիծ պատրաստելու համար ստեղծվել է հանձնաժողով, որն այս փուլում քննարկում է ստացած առաջարկները: Հանձնաժողովն այժմ գաղտնի է պահում, թե ինչ բնույթի առաջարկներ են ստացել, կամ ովքեր և որ գերատեսչություններն են ներկայացնում այդ առաջարկությունները: Իսկ Արդարադատության նախարարության երեկ տարածած հաղորդագրության համաձայն՝ հանձնաժողովի նախագահը կամփոփի ներկայացված առաջարկություններն ու դիտողությունները, և դրանք կներկայացվեն հանձնաժողովին, որի հաջորդ նիստը կկայանա նոյեմբերի 15-ին:
