Բրիտանական Չեսթերֆիլդի բնակիչն ազատազրկվել է՝ 13 տարի շարունակ դպրոցական ընկերուհուն հետապնդելու համար։ Ինչպես հայտնում է Daily Mail-ը, տղամարդը երազել է առևանգել նրան, անարգել, իսկ այնուհետև գլխատել։
27-ամյա Փիթեր Հոուլհաուսի մտադրությունը ծագել է դեռևս դպրոցում և ուժեղացել 2017 թվականի մարտին, երբ քաղաքի փաբերից մեկում հանդիպել է ծանոթ կնոջը։ Այդ օրը բրիտանացին տեսել է, թե ինչպես է նա համբուրվում սիրելիի հետ, ինչի պատճառով զայրացել է և իրեն «դավաճանված զգացել»։
Դրանից հետո տղամարդն ընկերոջը պատմել է, որ ցանկանում է դանակով սպառնալ նրան և ստիպել մեքենան նստել՝ միասին ժամանակ անցկացնելու համար։ Այնուհետև Հոլհաուսը նրան գրել է, որ ցանկանում է դանակով գլխատել կնոջը։
Նա այդ մասին խոստովանություն է արել նաև հիպնոթերապիայի ժամանակ։ Մասնագետը, իմանալով տղամարդու մտադրությունների մասին, դիմել է ոստիկանություն, որն էլ ձերբակալել է բրիտանացուն։ Նրա մեքենայի բեռնախցիկում գտնվել են գիշերային տեսանելիության ակնոցներ, բալակլավա, աղջկա տան և գրասենյակի լուսանկարները։
Լուրերը սարսափահար են արել կնոջը, նա վախենում է միայնակ տանը մնալուց։ Չարամիտ տղամարդուն դատապարտել են 7 տարվա ազատազրկման, որից 4-ը նա կանցկացնի բանտում, իսկ մնացած ժամանակը՝ ստորագրությամբ ազատության մեջ։ Նրան արգելվել է 2 կմ-ից մոտ գտնվել կնոջ բնակարանին։
