«Առաջին լրատվական»-ը երկու հարցում է արել Վանաձորի քաղաքապետարանին` «Վանաձորի օր» միջոցառման համար համայնքային բյուջեից արվող ֆինանսական հատկացման վերաբերյալ: Տոնից առաջ խնդրել էինք տրամադրել միջոցառման յուրաքանչյուր ծրագրի նախահաշիվը: Վանաձորի քաղաքապետի գրավոր պատասխանից, սակայն, պարզ էր դարձել, որ ոչ մի նախահաշիվ էլ միջոցառման վերաբերյալ չկա, հետևաբար անհասկանալի է` ինչպե՞ս է հաշվարկվել ու ավագանու կողմից հաստատվել միջոցառման համար նախատեսված 6 մլն-ը:
Քաղաքապետ Սամվել Դարբինյանը գրությամբ հայտնել էր. ««Վանաձորի օր» համաքաղաքային տոնախմբության և տոնի շրջանակներում անցկացվող բոլոր միջոցառումների համար 2013 թ. բյուջեով նախատեսված է եղել 6 մլն դրամ: Միջոցառումների ծրագրերը, ժամանակացույցը ներկայացված են մրցույթը շահած կազմակերպությանը, և յուրաքանչյուր բաղադրիչի վրա ծախսված գումարը, սահմանված կարգի համաձայն, հայտնի կլինի միջոցառումն անցկացնելուց հետո՝ մրցույթը շահած կազմակերպության կողմից ներկայացված կատարողական ակտերից»: Նկատենք, որ քաղաքապետի պատասխանում նշված չէ մրցույթը շահած կազմակերպության անվանումը:
Հոկտեմբերի 24-ին «Առաջին լրատվական»-ը քաղաքապետարան է մուտքագրել երկրորդ հարցումը` հետևյալ բովանդակությամբ` ի վերջո ո՞ր կազմակերպությունն իրականացրեց «Վանաձորի օր» միջոցառման կազմակերպական աշխատանքը, որտե՞ղ է տրվել կազմակերպման մրցույթի հայտարարութունը, ովքե՞ր են դիմել, ինչպե՞ս է անցկացվել մրցույթը, ի՞նչ սկզբունքով է ընտրվել հաղթողը: Խնդրել ենք նշել, թե նախորդ 3 տարիներին ո՞ր կազմակերպությունն է եղել «Վանաձորի օր» միջոցառման կազմակերպիչը: Եվ վերջապես խնդրել ենք տրամադրել այս տարվա «մրցույթը շահած» կազմակերպության կողմից քաղաքապետարան ներկայացված կատարողական ակտերը` միջոցառման ծախսերի վերաբերյալ:
«Տեղեկատվության ազատության մասին» ՀՀ օրենքի 9-րդ հոդվածի համաձայն` տեղեկություն ստանալու գրավոր հարցմանը պատասխան տրվում է այն ստանալուց հետո 5-օրյա ժամկետում: Նույն օրենքի 11-րդ հոդվածով տեղեկատվության տրամադրումը մերժելու դեպքում գրավոր տեղյակ է պահվում մերժման հիմքի մասին: 14 օր է Վանաձորի քաղաքապետարանը չի պատասխանում:
Մինչդեռ, ըստ տեղեկությունների, վերջին տարիներին մշակութային միջոցառումները Վանաձորում կազմակերպում է քաղաքապետարանի մշակույթի բաժնի աշխատակից Գրիշա Ղազարյանին պատկանող «Մոնտէմար» ՍՊԸ-ն:
