Նայելով Chanel-ի կենսուրախ ու վառ հավաքածուին՝ դժվար է պատկերացնել, որ այն ստեղծելիս ոգեշնչման աղբյուր են հանդիսացել Ֆրանսիայի նախագահ Էմանուել Մակրոնն ու նրա կինը՝ Բրիջիտը, իսկ ավելի ճիշտ՝ այն լավատեսական մթնոլորտը, որ հիմա տիրում է երկրում։ «Քանի տարի էլ որ ապրեմ Փարիզում, միևնույնն է, այստեղ ես օտար եմ և ավելի լավ եմ զգում տրամադրությունների փոփոխությունները։ Ես զգում եմ, որ Փարիզը գնալով աշխուժանում է, և ես ուրախ եմ դրա համար»,– ասում է Լագերֆելդը։ Իր ուրախ զգացմունքները դիզայներն արտահայտել է հավաքածուում, որտեղ Chanel-ի ֆիրմային կոստյումները ներկվել են ամենախիտ երանգներով, իսկ կերպարների գլխավոր զարդարանքը դարձել են ծաղիկները։ Դրանց մի մասը Լագերֆելդն օգտագործել է որպես դեկոր գլխարկների վրա, իսկ մյուս մասը վերածել է պրինտի և ծավալային դեկորի։ Շոուի երկրորդ մասը նվիրված է եղել պաստելային երանգներին. փղոսկր, կեղտոտ–վարդագույնն ու բաց դեղինը կարծես արևի ճառագայթ լինեին։ Այս Անգամ Լագերֆելդը բարդ ձևավորումներ չէր արել, այլ պարզապես հրավիրել էր հյուրերին փարիզյան այգի՝ արահետներով և շատրվաններով, որտեղ այնքան հաճելի է վայելել գարունը, երազել ու ոչնչից չվախենալ։
