Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի հրաժարվի սիրիական Աֆրինում գործողությունն ավարտին հասցնելու մտադրությունից, հայտնում է Yeni Safak թերթը։
««Եփրատի վահան» գործողության ժամանակ մենք հարված ենք հասցրել նրանց, ովքեր ծրագրել էին ահաբեկչության միջանցք ստեղծել մեր սահմանների երկայնքով։ Այդ ժամանակ ԱՄՆ-ն այդ տարածաշրջան մատակարարեց 5000 բեռնատարով սպառազինություն, որը բաշխվեց ահաբեկչական կազմակերպությունների միջև»,-հայտարարել է նա՝ հավելելով. «Գործողությունն Աֆրինում նույնպես կավարտվի, երբ իրագործվեն առաջադրված հանձնարարությունները»։
Էրդողանը խոստացել է, որ Թուրքիան վերահսկողություն կսահմանի Աֆրինի նկատմամբ, ինչպես դա արվել է ավելի վաղ սիրիական Ջերաբլուս, ալ-Ռայի և ալ-Բաբ քաղաքներում։ «Ես հայտարարում եմ, որ Անկարան չի ծրագրում զավթել Սիրիայի տարածքը։ Թուրքիայի հանձնարարությունն ազգային անվտանգությունն ու Սիրիայի տարածքային ամբողջականությունն ապահովելն է»,-պարզաբանել է նա։
Էրդողանի հայտարարությունից հետո հայտնվել է նորություն Սիրիայում գործողության ընթացքում առաջին թուրք զինծառայողի զոհվելու մասին։ Anadolu գործակալության հաղորդմամբ՝ զինվորը զոհվել է PKK-ի հետ մարտերի ընթացքում։
