«Այս օրենքի նախագիծը ծագեց Լիանա Զուրաբյանի հետ կապված հայտնի պատմությունից հետո, երբ ոստիկանությունը հրապարակեց տեսագրությունը»,- «Առաջին լրատվական»-ի հետ զրույցում ասաց «Իրազեկ քաղաքացիների միավորում» ՀԿ ախագահ Դանիել Իոաննիսյանը։ Նա նշեց, որ դրանից հետո իրենք դիմել էին անձնական տվյալների պաշտպանության գործակալություն, որը նշել էր, որ այդ տեսագրությունը հրապարակելը ոստիկանության կողնից ապօրինի էր։ «Ոստիկանությունը հասկանալով, որ այս հարցում իրենք օրենսդրության հետ խնդիր ունեն, որոշեցին օրենսդրությունը փոխել, որպեսզի հետագայում կարողանան արդեն ազատ հրապարակել նման տեսագրությունները։ Օրենքի հրատապության պատճառը սա էր, քանի որ ճանապարհային ոստիկանության տեսուչները արդեն վաղուց նկարահանումներ իրականացնում են, նրանց ամրակցված է տեսակցիկ»,- ասաց մեր զրուցակիցը։
Իոաննիսյանը չի կիսում «Ելք» դաշինքի պատգամավորների մտահոգությունները։ Նրա խոսքերով՝ այս օրենքը կարգավորիչ նպատակ ունի։ «Օրենքը կարգավորում է հանրային վայրերում, նաև մասնավոր հանրային վայրերում տեսանկարահանման իրականացումը ոչ գաղտնի պայմաններում։ Նկարահանման մասին հուշող վահանակներ են տեղադրվելու։ Այս օրենքը կարգավորում է հրապարակային վայրերում տեսանկարահանումները»։
Մեր զրուցակիցը նշեց, որ մինչ այս հանրահավաքների, ակցիաների ժամանակ ոստիկանության կողմից անձնական հեռախոսներով նկարահանումները եղել են ապօրինի։ Իոաննիսյանի խոսքերով՝ միակ մտահոգությունն այն է, որ այս օրենքի կիրառմամբ ոստիկանությունը կկարողանա հանրահավաքների ժամանակ տեղեկություններ հավաքել, թե ով է մասնակցել ցույցին, որը բացարձակապես ապօրինի է և ոստիկանությունը իրավունք չունի ցույցին մասնակցող անձանց մասին տեղեկություններ հավաքել։ «Այսինքն՝ եթե նախկինում այդ ապօրինությունը բացահայտ էր կատարվում, հիմա չի երևա։ Այս մասով մտահոգություն կա, բայց, կրկնում եմ, սա կարգավորող օրենք է և պետք չէ հայտարարել, թե այս օրենքով ոստիկանությունը մտնելու է մեր բնակարաններ»։
