Երեկ խորհրդարանում կայացած ՀՀ ԱԺ-ի և ՌԴ Դաշնային ժողովի միջև համագործակցության հանձնաժողովի նիստից հետո այդպես էլ պարզ չդարձավ, թե ինչ օգուտ է ստանալու Հայաստանը` մտնելով Մաքսային միություն:
Ռուսական պատվիրակության նախագահ Նիկոլայ Ռիժկովը միայն հայտարարեց, թե «Մաքսային միությունը Հայաստանին կօգնի մի շարք հարցերում», սակայն այդպես էլ չնշեց կոնկրետ մի հարց:
Հիշեցնենք, որ մի շարք հայաստանցի տնտեսագետներ պնդում են, որ Մաքսային միությանն անդամակցելը չի կարող նոր, իրական տնտեսական օգուտներ բերել Հայաստանին, սակայն կարող է նոր, բարձր մաքսատուրքեր առաջացնել եվրոպական ապրանքների համար, քանի որ Մաքսային միության հանդեպ եվրոպական շուկան կիրառում է այլ քաղաքականություն:
Փոխարենը Նիկոլայ Ռիժկովը «զգում է, որ հայաստանցիների մեծ մասը տրամադրված է, որ իրենց երկիրը դառնա Մաքսային միության անդամ»: «Մենք գիտենք, որ Հայաստանի բնակչության մեծ մասը ցանկանում է, որ Հայաստանը մտնի Մաքսային միություն, մենք ողջունում ենք այդ մոտեցումը: Իհարկե, գիտենք նաև, որ կային մարդիկ, ովքեր Արևմուտքի հետ էին ցանկանում խորացնել հարաբերությունները, սակայն այդտեղ սահմանափակումները շատ են: Այնտեղ մտնելը հնարավոր է, սակայն հետո ինչպե՞ս կարող ես դուրս գալ»,- բացատրել է Ռիժկովը: Եվրոպայի հետ համագործակցությունը, նրա խոսքով` կարող էր հսկայական խնդիրների առջև կանգնեցնել Հայաստանին:
Չնայած երեկվա միջխորհրդարանական հանձնաժողովը քննարկում էր ՌԴ և ՀՀ-ի միջև տրանսպորտային կապի բարելավման հարցը, և դա, Ռիժկովի համոզմամբ, երկաթուղային տրանսպորտի վերականգնումն է Աբխազիայի միջով, պարզվեց` դա կախված է Վրաստանի, Աբխազիայի ու Ռուսաստանի ղեկավարների քաղաքական կամքից, ոչ միջխորհրդարանական նիստերի քննարկումներից: Իսկ նման քաղաքական կամք այս պահին չի նշմարվում:
Ըստ Ռիժկովի՝ Աբխազիայի երկաթգծի վերականգնման աշխատանքները մեծ ծախսեր են պահանջելու, քանի որ Աբխազիայում գտնվող կամուրջը, որով անցնելու է երկաթգիծը, վնասված է, և 80 կմ տարածք դեռ ականապատ են, սակայն որքան էլ դա արժենա, պետք է հաղորդակցությունը վերականգնվի:
«Հարկավոր է, ի վերջո, քանդել տրանսպորտային շրջափակման այդ կծիկը, անհրաժեշտ է միայն քաղաքական կամք, որը հիմա բացակայում է: Գիտենք, որ Վրաստանը կոշտ դիրքորոշում ունի, սակայն հիմա իշխանափոխություն է տեղի ունեցել, գուցե համաձայնության գալը հնարավոր լինի: Այդ ուղղությամբ պետք է աշխատի ոչ միայն ռուսական կողմը, այլև հայկականը»,- ասաց Ռիժկովը` այդպես էլ չմանրամասնելով, թե ինչ է մտադիր անել Ռուսաստանը Աբխազական երկաթգիծը բացելու ուղղությամբ:
