«Առաջին լրատվական»-ի զրուցակիցն է «Ելք» խմբակցության պատգամավոր Էդմոն Մարուքյանը:
-Պարոն Մարուքյան, երեկ Սերժ Սարգսյանը ներկայացրեց ՀՀԿ-ի առաջադրած թեկնածուին՝ նախկին վարչապետ, Մեծ Բրիտանիայի և Հյուսիսային Իռլանդիայի միացյալ թագավորությունում ՀՀ արտակարգ և լիազոր դեսպան Արմեն Սարգսյանին: Արդյոք Սերժ Սարգսյանի՝ նախագահի թեկնածուի բնորոշիչները, որ պետք է քաղաքականությամբ զբաղված չլինի, անկուսակցական չլինի, արտերկրում և Հայաստանում ունենա վստահություն, համապատասխանում են Արմեն Սարգսյանին:
-Ես զարմանում եմ, թե ինչու են մամուլում այդքան շրջանառվում Սերժ Սարգսյանի ներկայացրած բնորոշիչները, քանի որ դա Սերժ Սարգսյանի կարծիքն է, իր մոտեցումն է, իր բնորոշիչները: Գոյություն ունեն սահմանադրական չափանիշներ, դրանից բարձր չափանիշներ չկան, հիմա պետք է առաջադրել այդ չափանիշներին համապատասխանող թեկնածու:
-Սերժ Սարգսյանն ակնկալում է ընդարձակ համաձայնություն նախագահի թեկնածուի շուրջ: Հնարավո՞ր է՝ «Ելք»-ը նույնպես աջակցի Արմեն Սարգսյանին:
-Միայն այն գործընթացը, որում մենք հայտնվել ենք, որ կա անայլընտրանք թեկնածու և հնարավորություն չկա այլ թեկնածու առաջադրելու, դա բավարար է, որ խմբակցությունը դեմ քվեարկի, և իշխանությունների՝ կոնկրետ մեզ վրա հույս դնելը, կարծում եմ, անտեղի է: Այսինքն՝ լայն համաձայնության ակնկալիքը, որ իրենք ունեն, որքանով ես հասկանում եմ, «Ծառուկյան» դաշինքի մասին է խոսքը գնում, որովհետև առանց «Ծառուկյան» դաշինքի՝ առաջին փուլում չեն կարող ընտրել նախագահի թեկնածուին: Եվ նաև սա է պատճառը, որ նրանք չմիացան »Ելք» խմբակցության առաջադրած թեկնածուի ստորագրահավաքին:
-Իշխանության ներկայացուցիչները մեզ հետ զրույցում նշում են, որ ակնկալում են նաև «Ելքից» այդ աջակցությունը:
-Թող ակնկալեն, ինչ կա դրա մեջ, թող ակնկալեն, ինչ է խանգարում:
-Ինչո՞ւ ընտրությունը կանգ առավ Արմեն Սարգսյանի թեկնածության վրա: Արդյոք նա կարո՞ղ է համերաշխություն ապահովել քաղաքական ուժերի մեջ՝ բացառությամբ «Ելք»-ի:
-Ես չեմ կարող ասել, թե ինչու: Կարծում եմ՝ պետք է հարցնեք նրանց, ովքեր առաջադրել են: Մենք մեր թեկնածուին ունենք, մենք ասել ենք, թե մենք ինչու ենք կանգնել այդ թեկնածուի վրա: Ինչ վերաբերում է իշխանություններին, ապա իրենք պետք է ասեն, թե ինչու Արմեն Սարգսյանը և ինչու ոչ այլ անձ: Կարծում եմ՝ Արմեն Սարգսյանի թեկնածությունը լուրջ խնդիր է առաջացնում կոնկրետ ՀՀԿ-ի ներսում, որովհետև այս էլ որերորդ անգամ է՝ շատ կարևոր պաշտոններում ՀՀԿ ներկայացուցիչները չեն առաջադրվում կամ ՀՀԿ թեկնածու չի ընտրվում իրենց թիմակիցներից: Սա, ըստ էության, առաջին հերթին նշան է հանրապետականների համար, որ ձեր մեջ չկա մի մարդ, որ կարող է հավակնել կամ համապատասխանել նախագահի պաշտոնին:
-Պարոն Մարուքյան, Արմեն Սարգսյան թեկնածուի վերաբերյալ ի՞նչ կարծիք ունեք: Կարողանալու է արդյոք իր անձնական կարծիքն արտահայտե՞լ:
-Ըստ սահմանադրության՝ նախագահն ունի ներկայացուցչական ֆունկցիաներ: Ներկայացուցչական իմաստով նրա փորձը, կարծում եմ, բավարար է՝ Հայաստանը կարողանա շատ լավ ներկայացնել: Ներկայացուցչական իմաստով մեծ հաշվով խնդիր չեմ տեսնում:
-Արմեն Սարգսյան նշել է, որ ինքը չունի որոշում և իրեն ժամանակ է պետք: Կարծում եք՝ նա դեռ չունի որոշո՞ւմ:
-Խոսքը գնացել է կունսուլտացիաների մասին, բայց կարծում եմ՝ ըստ էության համաձայնությունը կա, քանի որ այդ քննարկման համար արդեն հրապարակային դաշտ է բացվել: Որովհետև եթե համաձայնությունը չլիներ, նման հանդիպման լուսաբանում չէր լինի, որովհետև չի բացառվում, որ այլ թեկնածուներ էլ են քննարկվել, հանդիպումներ եղել են, բայց դա չի հրապարակվել: Հրապարակվել է այն թեկնածուն, որի հետ կապված արդեն վերջնական դիրքորոշում և համաձայնություն կա:
-Ձեր ֆրակցիայի հետ հանդիպում նախատեսվա՞ծ է:
-Եթե ֆրակցիային դիմի Արմեն Սարգսյանը հանդիպելու համար, ապա մենք անպայման կհանդիպենք: Խորհրդարանական ընթացակարգը ենթադրում է, որ պետք է գան խմբակցությունների հետ հանդիպման:
