Բունդեսթագի ղեկավար Նորբերտ Լամերտը պահպանել է իր գիտական կոչումը. Ռուրի համալսարանը, որը ստուգել է նրա դիսերտացիան գրագողության մեղադրանքներից հետո, դա հաստատող ապացույցներ չի գտել: Այս մասին հաղորդում է Ria Novosti-ն՝ վկայակոչելով բուհին:
Լամերտին գրագողության մեջ է մեղադրել անանուն բլոգերը` «Ռոբերտ Շմիտդ» կեղծանվամբ: Բլոգերը գրել է, որ Լամերտը նույնիսկ չի կարդացել թվարկած գրականության աննշան մասը:
Բունդեսթագի նախագահի դոկտորական աշխատանքը՝ նվիրված կուսակցաշինության հարցերին, գրվել է 40 տարի առաջ: Նա այն պաշտպանել է Ռուրի համալսարանի սոցիոլոգիայի ֆակուլտետում:
Ուսումնական հաստատության ռեկտոր Էլմար Վայլերը նշել է, որ գիտնականները մանրամասն ստուգել են գիտական աշխատանքում կասկած հարուցող յուրաքանչյուր հատված:
