Ինչպես Ազգային ժողովում ակնարկել է Քաղաքաշինության նախարարը, այս տարին էլ շինարարության համար բացառություն չի լինի: Դեռ ճգնաժամային տարիներին անկումը սկսած շինարարությունն անկումը կշարունակի նաև 2013թ.-ին: 2014թ.-ի պետբյուջեի հաշվարկման հիմքում դրված է շինարարության 4.5 տոկոս անկման ցուցանիշը: Սակայն Քաղաքաշինության նախարարը Ազգային ժողովում բյուջեի քննարկումների ժամանակ հայտարարել է, որ անկումն իհարկե կլինի, բայց թե որքան, չի կարող ասել, պարզ կլինի տարեվերջին: Սա կարող է նշանակել, որ անկումը հնարավոր է շատ ավելի մեծ լինի, քան նախատեսում էր գործադիրը: Հունվար-սեպտեմբերին` 2012թ.-ի հունվար-սեպտեմբերի համեմատ անկումն արդեն 9.2 տոկոս է` ըստ Ազգային վիճակագրական ծառայության տվյալի:
Կառավարությունը սպասում է, որ 2014թ-ին արդեն շինարարությունը կսկի աճել և այդ աճը կլինի 3 տոկոս:
Ոլորտին հատկացումները 2014թ.-ին բավական ավելացել են: 2014թ.-ին քաղաքաշինությանը կհատկացվի 13 մլրդ 183 մլն 113.5 հազար դրամ, ինչը այս տարվա համար հաստատված ցուցանիշը գերազանցում է 20 տոկոսով: Գումարի հիմնական մասը` 9 մլրդ 645 մլն դրամը, կուղղվի կրթական օբյեկտների հիմնանորոգմանն ու շինարարությանը:
