Արցախի նախագահ Բակո Սահակյանի խորհրդական Գառնիկ Իսագուլյանի կարծիքով՝ նախագահը քաղաքական կերպար է, պետք է որոշակի քաղաքական դպրոց անցած լինի։ «Սերժ Սարգսյանը, երևի թե, նկատի է ունեցել ակտիվ քաղաքականությունը։ Այսօր փողոցում ում էլ կանգնեցնեք հարցեր տաք՝ կպարզվի, որ նա քաղաքականությամբ զբաղվում է, այստեղ խոսքն ակտիվ քաղաքականության մասին է։ Ես կարծում եմ, որ հաջորդ նախագահի համար Հայաստանը պետք է ամեն ինչից վեր լինի, Արցախի Հանրապետությունը նրա համար պետք է լինի երկրորդ հայրենիք»,- «Առաջին լրատվական»-ի հետ զրույցում ասաց Իսագուլյանը։
Մեր զրուցակիցը նշում է՝ ինքն անձամբ ունի նախընտրած թեկնածու, բայց այդ մասին այժմ չի բարձրաձայնի։ «Իմանալով Սերժ Սարգսյանի բնավորությունը, կասեմ, որ նա շահագրգռված է, որ 4-րդ նախագահը բոլորի նկատմամբ ունենա նույն վերաբերմունքը։ Ի վերջո, բոլոր ճգնաժամային իրավիճակներում այդ մարդը լինելու է մեկը, որը բոլոր օղակների համար արբիտրի նման մի բան է դառնալու»,- ընդգծեց մեր զրուցակիցը։
Գառնիկ Իսագուլյանը շեշտում է՝ իր պատկերացմամբ՝ այժմ կա մեկը, որը շատ լավ գիտի Սփյուռքը, երբեք կուսակցական չի եղել և լավ ֆունկցիոներ է. «Այժմ չեմ ասի, թե ում նկատի ունեմ։ Բայց չմոռանանք, որ նոր Սահմանադրության մեջ հստակ շեշտված է, որ պետության գլուխը նախագահն է։ Չեմ ասում, որ չասեն՝ քանի որ Իսագուլյանն է ասում, ուրեմն ինչ-որ բան գիտեր։ Դա Հանրապետական կուսակցության լիազորությունների ներքո էր՝ թույլ տանք, որ իրենք մտածեն»։
Հարցազրույցն ամբողջությամբ՝ տեսանյութում։
