Միացյալ երիտասարդական լիգայի համանախագահ Սևակ Հովհաննիսյանն այսօր լրագրողների հետ հանդիպմաը հայտարարեց, որ Երևանի մի քանի, Պռոշյան գյուղի և Եղվարդի դպրոցներում իրենք հայտնաբերել են Մշակութային լիգա անունով աղանդ, որն աշխատում է անմիջապես երեխաների հետ:
Խոսելով Պռոշյան գյուղի մասին, ասաց, որ տնօրենը հերքել է, թե դպրոցում աղանդավորական կառույց կա, սակայն իրենց ձեռքի տակ կան նկարներ և տեսահոլովակ, թե «Մշակութային լիգա» անունով կազմակերպությունն ինչ գործունեություն է ծավալում երիտասարդների շրջանում. «Ասում են՝ իբր իրենք ավելի մեծ հնարավորություններ են տալիս աշակերտներին՝ ընկալելու համար, սակայն գործունեության համար ո՛չ մշակույթի, ո՛չ կրթության գիտության նախարարություններից որոշում չեն ստացել»:
Բանախոսն ասաց, որ իրենք իրենց հրապարակումները նամակով ուղարկել են կրթության և գիտության նախարարություն, սակայն դեռևս ոչ մի արձագանք չեն ստացել:
Նա հավելեց, որ աղանդի հիմքում ընկած է Նիկոլայ Ռելիխի ուսմունքը, իսկ Հայաստանում դրա առաջնորդը Ռուսաստանից եկած Աշոտ Աղաբաբյանն է:
Ասուլիսին ներկա էր նաև հասարակական-քաղաքական գործիչ Խաչիկ Ստամբոլցյանը, որը նշեց, որ ուսմունքը տարածվել է Շամբալայից, որը Հիմալայան լեռներում գտնվող տաճար է: Ըստ տարածված տեսակետի՝ Շամբալային տիրողը կառավարում է աշխարհը. «Ստալինը 27 թվին, Հիտլերը՝ 37 թվին, փորձում էին կապ հաստատել Շամբալայի հետ, որովհետև կարծում էին, թե ավելի հզոր կլինեն»:
Նա նաև հավելեց, որ աղանդների շատացումը ինչպես ԱԺ-ի, այնպես էլ ներքին գործերի նախարարության ու կրթության և գիտության նախարարության մեղքով է:
