Հայաստանի համար 10 տարին բավական ժամանակ է, որպեսզի պետական պաշտոնյաներն հասկանային` ինչ է տեղեկատվության ազատությունը: Այսօր տեղի ունեցած մամուլի ասուլիսի ժամանակ այս մասին ասաց Ինֆորմացիայի ազատության կենտրոնի իրավաբան Գևորգ Հայրապետյանը` հավելելով, որ տեղեկատվության ազատության իրավունքի կիրառման պրակտիկան այսօր ցույց է տալիս, որ տեղեկություն ստանալու հարցումների մեծամասնությունն անպատասխան չի մնում, տեղեկություն տնօրինող գրեթե բոլոր մարմիններն էլ այս կամ այն կերպ արձագանքում են հարցումներին:
Նրա խոսքով՝ լուռ մերժումների թիվը վերջին շրջանում կրճատվում է:
«Երկու տարի առաջ անպատասխան էր մնում մեր հարցումների մոտ 30 տոկոսը, այնինչ վերջին մեկ տարվա ընթացքում լուռ մերժումները կազմում են ընդհանուր հարցումների ընդամենը 9 տոկոսը: Առավել հաճախակի են թերի, ոչ լիարժեք պատասխանները:
Մեր սև ցուցակում են ԱԺ նախագահ Հովիկ Աբրահամյանը, ՀՀ էներգետիկայի և բնական պաշարների նախարար Արմեն Մովսիսյանը, ՊԵԿ նախագահ Գագիկ Խաչատրյանը, Երևանի քաղաքապետ Տարոն Մարգարյանը, տրանսպորտային ծառայություններ մատուցող մասնավոր ընկերությունների ղեկավարներ և այլն: Նրանցից շատերը սև ցուցակում հայտնվել են խիստ ուշացած և թերի պատասխանների համար»,-ասաց նա:
Գևորգ Հայրապետյանի խոսքով, դեռևս դժվար է ասել` որն է ամենափակ, ամենադժվարը տեղեկատվություն տրամադրող կառույցը: Իսկ ահա տեղեկատվություն ամենաարագը տրամադրող մարմինը, պարզվում է, ֆինանսների նախարարությունն է: «Թերևս բոլոր նախարարություններ էլ, փոքր վերապահումներով, այս առումով բավական լավ են աշխատում»,- ասաց իրավաբանը:
Լուսանկարը` PanARMENIAN Photo-ի
