«Ծառուկյան» խմբակցության մի քանի անդամներ Հարկային օրենսգրքում լրացում կատարելու մասին առաջարկությամբ են հանդես եկել, որը սակայն մերժվեց ՀՀ ԱԺ տնտեսական հարցերի մշտական հանձնաժողովում։
Այս առնչությամբ, «Ծառուկյան» խմբակցության պատգամավոր Վահե Էնֆիաջյանը «Առաջին լրատվական»-ի հետ զրույցում նշեց. «Մենք առաջարկում ենք հարկային արտոնություն տրամադրել գյուղացիներին։
Այսինքն՝ այն գյուղացիներին, որոնք ուզում են տնտեսություն զարգացնել և առերեսվում են բնական աղետների, և վնասը 40 և ավելի տոկոս է կազմում, այդ տվյալ տարվա համար նրանց հողի հարկից ազատել, քանի որ մենք շատ լավ գիտակցում ենք, որ տվյալ քաղաքացին, ըստ էության, իր տնտեսությունը զարգացնում է հիմնականում վարկերի միջոցով, և եթե եկամուտ չի կարողանում ապահովել, մնում է վարկային պարտավորությունների բեռի տակ, դրան հավելյալ ավելանում է հողի հարկը։ Մենք առաջարկում ենք մեկ տարով հետաձգել այդ հարկի վճարումը»։
Դիտարկմանը, թե կառավարության ներկայացուցիչն ասել է, թե իրենք չունեն նման հնարավորություն, Էնֆիաջյանն ասաց. «Ինձ համար այդ մեկնաբանությունը համոզիչ չէր և այն բացասական եզրակացությունը, որ տվեց ԱԺ տնտեսական հարցերի հանձնաժողովը, ես ինքս չհամաձայնելով, լիագումար նիստ եմ տեղափոխել հարցը։ Այնտեղ կներկայացնեմ և ևս մեկ անգամ կմատնանշեմ ու կհորդորեմ մեր գործընկերներին, որ մեր գյուղացիներին պարզապես այդ հնարավորությունն ընձեռեն»։
Անդրադառնալով գնաճին, «Ծառուկյան» խմբակցության պատգամավորն ասաց. «Մենք այդ հարցը ԱԺ-ում բարձրացրել ենք։ Պետք է խորքային հասկանալ, թե ի՞նչն է պատճառը, որ այդպես շղթայական ու փոխկապակցված գնաճ ենք արձանագրում»։
