ԱՄՆ նախագահի նախկին խորհրդական Սթիվ Բենոնին դատական հայց է սպասվում հարցազրույցի պատճառով, որ նա տվել է Դոնալդ Թրամփի աշխատակազմի մասին գրքի հեղինակ՝ Մայքլ Վուլֆին։
Թրամփի իրավաբանները արդեն պաշտոնական նամակ են ուղարկել Բենոնին, որտեղ մեղադրել են նրան տեղեկատվության չհրապարակման մասին համաձայնագրի խախտման վերաբերյալ։ Նամակում մասնավորապես խոսվում է այն մասին, որ Թրամփի նախկին խորհրդականը «արհամարհական և որոշ դեպքերում զրպարտչական հայտարարություններ է արել» ԱՄՆ նախագահի, նրա ընտանիքի և նախընտրական արշավի վերաբերյալ։
Իրավաբանները պահանջել են Բենոնից, որ նա զերծ մնա Թրամփի և նրա շրջապատի վերաբերյալ հետագա մեկնաբանություններից, նշելով, որ սկսել են փաստերի հավաքագրումը դատական գործընթաց սկսելու համար։
Թրամփն իր հերթին հայտարարել է, որ «Բենոնը կորցրել է ոչ միայն իր աշխատանքը նախագահի աշխատակազմում, այլ նաև խելքը»։
Մայքլ Վուլֆի՝ «Կրակ և ցասում. Սպիտակ տան ներսում՝ Թրամփի օրոք» գիրքը վաճառքի կհանվի հունվարի սկզբին։ Գրքից հատվածներ տպագրվել են հունվարի երեքին՝ New York Magazine–ում։
Գրքում մասնավորապես ասվում է, որ Թրամփն ու իր թիմը հույս չեն ունեցել հաղթանակ տանել ընտրություններում, և քվեարկության արդյունքները նրանց զարմացրել են։ Վուլֆը, հղում անելով Բենոնին, գրում է, որ Թրամփի ընտանիքը մի որոշ շրջոն պատրաստ չի եղել ֆինանսական ներդրումներ անել նրա նախընտրական արշավի համար, քանի որ հաղթանակի որևէ երաշխիք չեն ունեցել։
Բենոնը նաև հաղորդել է գրքի հեղինակին, որ Թրամփի որդու հանդիպումը ռուսական խմբի հետ, այդ թվում փաստաբան Նատալյա Վեսելնիցկայայի հետ, դավաճանություն է համարում։ Բացի այդ գրքում նշվում է, որ Թրամփի դուստրը՝ Իվանկան, ցանկանում է դառնալ ԱՄՆ առաջին կին նախագահը։
