Ռուսական էներգետիկ «Գազպրոմ» ընկերության մատակարարումները կազմում են Եվրոպայի կողմից սպառվող գազի ընդհանուր ծավալների 40 տոկոսը։ Այս մասին հայտնում է The Financial Times-ը։
Նշվում է, որ եվրոպական շուկայում իր մասնաբաժնի պահպանման համար «Գազպրոմը» ստիպված է եղել իջեցնել գները։ Դա տեղի է ունեցել այն բանից հետո, երբ ԵՄ-ն սկսել է ավելի շատ գազ ձեռք բերել ԱՄՆ-ից, Կատարից և այլ երկրներից։
«Գազպրոմը» երկրորդ տարին անընդմեջ հայտնում է գազային արտահանման ռեկորդային ցուցանիշների մասին՝ չնայած Լեհաստանում և Լիտվայում հեղուկացված բնական գազի ընդունման տերմինալների ստեղծմանը։
Ոչ բավարար էֆեկտիվ են եղել որոշ արևելաեվրոպական երկրների փորձերը՝ արգելափակելու դեպի Գերմանիա ռուսական գազի մատակարարումների ծավալների ընդլայնման նախագծերը, ինչպիսին է «Հյուսիսային հոսք-2»-ը, գրում է պարբերականը։
«Գազպրոմի» ղեկավար Ալեքսեյ Միլլերը հունվարի 3-ին հայտարարել էր, որ 2017 թվականին ընկերությունը մեծացրել է գազի արդյունահանումը 12.4 տոկոսով՝ հասցնելով 471 մլրդ խորանարդ մետրի։ Դեպի Եվրոպա գազի արտահանումն աճել է 8.1 տոկոսով՝ հասնելով 193.6 մլրդ խորանարդ մետրի, փոխանցում է RIA Novosti-ն։
Էներգետիկ ընկերությունների S&P Platts գլոբալ վարկանիշում «Գազպրոմը» շահույթի մասով առաջին տեղն է զբաղեցնում։
