Դուբայում այցելուների համար բացված նոր տեսարժան վայրը լուսանկարի հսկայական շրջանակի տեսքով կառույցն է։
150 մետր բարձրությամբ երկու աշտարակները իրար են միացված 93 մետր երկարությամբ ապակե կամուրջով։ «Շրջանակի» գագաթին գտնվում է դիտակետը։
43,6 միլիոն դոլար արժողությամբ նախագիծը, որ սկսվել էր 2013 թվականին, պետք է պաշտոնապես բացվեր 2015 թվականին, սակայն հետաձգվել էր։ Շինարարությունը ձգձգվել էր անհրաժեշտ նյութերի պակասի պատճառով։
Կառույցը գտնվում է Zabeel Park պուրակում և իր ձևով նկարի կամ լուսանկարի շրջանակ է հիշեցնում։ Նրա միջով տեսարան է բացվում դեպի ժամանակակից Դուբայը՝ մի կողմից, և դեպի քաղաքի ավելի հին մասը՝ մյուս կողմից։
Պանորամային վերելակը այցելուներին վերև է տեղափոխում, որտեղից քաղաքին նայող տեսարան է բացվում։ Շինարարության ընթացքում օգտագործված նյութերը չբռնկվող են և համապատասխանում են անվտանգության ստանդարտներին։
