Ուկրաինայում և Սիրիայում իրադարձությունների հետ կապ չունենալու մասին Ռուսաստանի հայտարարություններին ոչ ոք չի հավատում: Այս մասին «Ամերիկայի ձայնին» տված հարցազրույցում ասել է ԱՄՆ նախագահ Դոնալդ Թրամփի խորհրդական Հերբերտ Մաքմասթերը:
Նա նշել է, որ նույն կերպ են վերաբերվում նաև ԱՄՆ-ում և Եվրոպայում ընտրություններին չմիջամտելու մասին Կրեմլի պնդումներին:
«Այդ նույն մարդիկ հայտարարում են, որ չեն խփել ինքնաթիռը (MH17 չվերթի աղետը 2014 թ.) և չենք սպանել այդ բոլոր մարդկանց»: «Ոչ, մեր զինվորները չկան Ղրիմում և Ուկրաինայի արևելքում»: «Մենք չենք աջակցում սիրիական ռեժիմին, որը պատասխանատու է քիմիական զենքի կիրառմամբ սեփական քաղաքացիների զանգվածային սպանության համար»: Այսօր այդ խոսքերին արդեն ոչ ոք չի հավատում»,- հայտարարել էՄաքմասթերը:
Նրա խոսքով՝ արաբական յուրաքանչյուր պետություն պետք է հասկանա, որ Մերձավոր Արևելքում Ռուսաստանը ձգտում է օգտագործել Իրանի ապակառուցողական գործողությունները, որը թեժացնում է հակամարտությունները տարածաշրջանում և զինում է ահաբեկչական խմբավորումները:
«Այդպիսի աջակցության համար Ռուսաստանը ստիպված կլինի մեծ գին վճարել»,- հայտարարել Մաքմասթերը:
Նա նաև կոչ է արել ՌԴ-ի նոր ռազմավարությանը դիմակայելու միջոց գտնել, որը ներառում է քարոզչության, ապատեղեկատվության և սոցիալական ցանցերի օգտագործում հասարակության պառակտման համար:
