Թիվ մեկ տուն-ինտերնատում տոնական տրամադրություն է։ Չնայած այստեղ հայտնվելու տարբեր՝ նույնիսկ ամենադաժան պատճառներին, մեր զրուցակիցները չեն դժգոհում, լցված են ապագայի նկատմամբ հույս ու հավատով։
Լաերտ Մովսիսյանը 30 տարվա սպորտսմեն է, կրթություն է ստացել Լենինգրադում, այստեղ է հայտնվել ընկերական շրջապատից կտրվելու համար։
Կինը մահացել է, ասում է՝ չնայած տուն-ինտերնատում կան իրենց երջանկությունը երկրորդ անգամ գտած զույգեր, ինքն իր կնոջը շատ է սիրում, չի դավաճանի։
Ռուզաննա Գրիգորյանը քաղցկեղ ունի, անցել է բազմաթիվ դժվարությունների միջով, բայց ապագայի նկատմամբ հույսն ու հավատը չի կորցրել. «1.5 տարվա մեջ 20 քիմիաթերապիա եմ անցել, բայց լավատես եմ, ուզում եմ ապրել»։
Լիդա Պոպովան ևս լավատես է․ 2018-ի միակ ցանկությունն առողջ լինելն է։
Սոնյա Մարտիրոսյանն արդեն երեք տարի է տուն-ինտերնատում է, որևէ դժգոհություն չունի, այստեղ հանդիպել է իր վաղեմի ծանոթին՝ ամուսնացել. «Կռվի ժամանակ ենք ծանոթացել, այստեղ հանդիպել ենք՝ հիշել լավ ու վատ օրերը, ինքն առաջարկել է, ես էլ համաձայնվել եմ»։
Ռոբերտ Հայրապետյանի ընտանիքը Ռուսաստանում է, Հայաստանում հարազատ չունի, իսկ Ռուսաստան մուտքն արգելված է։ Ստիպված է եկել տուն-ինտերնատ, շատ է ցանկանում նորից լինել ընտանիքի կողքին։
Արթուր Օհանյանն ակտիվ հետևում է քաղաքական գործընթացներին, ասում է՝ տուն-ինտերնատում կան և՛ իշխանամետներ, և՛ ընդդիմադիրներ, նույնիսկ քաղաքական թեժ բանավեճեր են ունենում։ Երեխաներ ունի՝ չգիտեն, որ տուն-ինտերնատում է։
Սուսաննա Ղարագյոզյանը ևս մասնակցում է տոնական միջոցառմանը՝ չնայած տոնախմբության ընթացքում տրամադրությունը բարձր էր, նույնիսկ պարեց մի քանի անգամ, տեսախցիկի առջև հուզվեց։
