Լիբանանի ԱԳՆ ղեկավար Ջեբրան Բասիլը ստիպված է ներողություն խնդրել իր հարցազրույցի համար, որում ասել է, որ «Իսրայելը գոյության իրավունք ունի»:
Դեկտեմբերի 26-ին Բասիլն «Ալ-Մայադին» հեռուստաալիքին տված հարցազրույցում ասել է, որ եթե արաբական երկրները միասնական ճակատով հանդես գային, ԱՄՆ նախագահ Դոնալդ Թրամփը չէր որոշի հայտարարել դեսպանատունը Երուսաղեմ տեղափոխելու մասին:
Նա նաև ասել է, որ չի հերքում Իսրայելի գոյության և իր սահմանների անվտանգության իրավունքը:
Նախարարի խոսքերը վրդովմունք են առաջացրել լիբանանյան խորհրդարանում: 2 օր անց ԱԳՆ ղեկավարը ստիպված է եղել պարզաբանել իր դիրքորոշումը:
Նա հայտարարել է, որ իր հարցազրույցը խեղաթյուրված է եղել, իսկ խոսքերը՝ դուրս բերված կոնտեքստից:
«Ալ-Մայադին» հեռուստաալիքը հրապարակել է Լիբանանի ԱԳՆ ղեկավարի գրասենյակի տարածած հայտարարությունը, որում ասվում է, որ Լիբանանի դիրքորոշումն արաբ-իսրայելական հակամարտության վերաբերյալ չի փոխվել, Բեյրութը շարունակում է պնդել, որ պաղեստինյան հարցը լուծվի արաբական խաղաղ նախաձեռնության շրջանակներում, որը համաձայնվել է Բեյրութում 2002 թ. մարտին:
