Այսօր էլ, ինչպես տեղեկացրել էինք Սերժ Սարգսյանը Երևանի պետական համալսարանում էր՝ ԵՊՀ հոգաբարձուների խորհրդի նախագահի կարգավիճակով նիստին մասնակցելու:
Երևանի պետական համալսարանի դոցենտ Սամվել Կարաբեկյանը ֆեյսբուքյան իր էջում այդառնչությամբ գրառում է կատարել.
Այսօր սովորականի պես գնացի համալսարան (դե ես աշխատում եմ այնտեղ՝ արդեն 33 տարի)։ Տարածք մտնելու պահին առջևումս հայտնվեց անվտանգության (ոչ իմ անվտանգության, պարզ է) աշխատակիցը և արգելեց մուտքս։ Գլխի ընկա՝ անսովոր ամայությունը և հեռվից երևացող սև ու հսկա մեքենաները, ինչպես նաև հատուկ ջոկատայինների ավտոբուսը հուշեց, որ համալսարանում հոգաբարձուների խորհրդի նիստն է ընթանում (զվարճալի զուգորդություն է, չէ՞)։ Այնուամենայնիվ, փորձեցի՝ ներկայանալով և ասելով այն, ինչից այս գրառումս սկսեցի։ Անվտանգության (ոչ իմ) աշխատակիցն ինձ առաջարկեց՝ «Ա՛խպեր դե Ալեք Մանուկյանով գնա»։ Հանգիստ խնդրեցի ինձ նման կերպ չդիմել։ Ասաց՝ ես «ա՛խպեր» չեմ ասել։ Շրջվեցի դեպի իր կողքին կանգնած ոստիկանության ենթասպան՝ նա անվտանգության (ոչ իմ) աշխատակիցների նախանձելի համերաշխությամբ հաստատեց, որ նման բան չի ասվել (այո, այո, դուք է՞լ հիշեցիք ոստիկանների ցուցմունքով դատապարտվածներին)։ Զսպելով նողկանքս, հեռացա։
…Իսկ մենք այս օրերին լուրջ-լուրջ քննարկում ենք բարձրագույն կրթության նոր օրինագծում բուհական ինքնավարության և ակադեմիական ազատությունների ընդլայնման մասին կետերը։ Չի բացառվում, որ շրջափակման օղակում ընթացող նիստում հենց այդ պահին էլ խոսվում էր դրա մասին…
Դե ինչ ասեմ՝
Vivat academia!
Vivant professores!
