Սիրիայի բանակի մարտիկները չեզոքացրել են «Ջեբհաթ ան Նուսրա» խմբավորման ահաբեկիչների կողմից ճակատի ճեղքման սպառնալիքը Հալեպից հարավ գտնվող տեղամասում։ Այդ մասին հաղորդվում է Դամասկոսում հրատարակվող Al Watan թերթի կայքում։
Ինչպես տեղեկացնում է ՏԱՍՍ-ը, հրատարակության տվյալներով՝ ահաբեկիչները կառավարական զորքերի վրա գրոհել են Հան Թուման բնակավայրի կողմից, սակայն հետ են շպրտվել։ Սիրիական հրետանին հարվածներ է հասցրել հակառակոորդին՝ ոչնչացնելով մեկ տանկ, երկու զրահամեքենա, մի քանի հրանոթ և գնդացիրներով հինգ ավտոմեքենա։ Զինյալները տվել են ավելի քան 30 զոհ։
Ինչպես նշում է Al Watan-ը, «Ջեբհաթ ան Նուսրա»-ի և դրա դաշնակիցների հարձակման նպատակն էր խափանել գործողությունը, որը սիրիական հրամանատարությունը նախապատրաստում է Հալեպի մատույցների հարավային և հարավ-արևմտյան ճակատում։ Զորքերի առջև խնդիր է դրվել վերադարձնել ռազմավարական Դամասկոս-Հալեպ մայրուղու տեղամասերը, որոնց նկատմամբ հսկողությունը կորցրել էին երկու տարի առաջ, ինչպես նաև հարձակում ծավալել Աբու Զուհուր ռազմական օդանավակայանի վրա։
Բանակը և աշխարհազորայինները «Ջեբհաթ ան Նուսրա»-ի հրոսակների դեմ մարտեր են վարում Համա նահանգի (Դամասկոսից 220 կմ հեռավորության վրա) հյուսիսում՝ Մշեյրֆա- Էլ Լաթամանա գծի վրա, և Հոմսից հյուսիս տարածքում (Դամասկոսից 165 կմ հեռավորության վրա)՝ Ջաբուրին և Մաշրուա բնակավայրերի շրջանում։
