Արդարադատության նախարար Դավիթ Հարությունյանը երեկ լրագրողների հետ ճեպազրույցում, անդրադառնալով Սերժ Սարգսյանի հնարավոր վարչապետության վերաբերյալ հայտարարություններին, ասել է, որ ինքը չի կարող խոսել այդ հեռանկարի մասին, քանի որ ամեն ինչ կախված է լինելու որոշման ժամանակի հանգամանքներից, իրադարձությունների զարգացումից:
Այսինքն՝ Դավիթ Հարությունյանը, ըստ էության, հայտարարել է, որ Սերժ Սարգսյանի վարչապետությունն ամենևին վճռված հարց չէ և ամենևին ցանկությունների տիրույթի հարց չէ, այլ, այսպես ասած, հնարավորությունների:
Հարությունյանի այդ հայտարարությունն, ըստ էության, հակասում է ՀՀԿ-ականների շարքում վերջին օրերին բավականին բուռն հայտարարությունների տարափին, որ կա Սերժ Սարգսյանի վարչապետական անփոխարինելիության մասով: Հարությունյանը պարզապես զգուշավորությո՞ւն է ցուցաբերում, թե՞ պարզապես նրա դիրքորոշումը վկայում է, որ Սերժ Սարգսյանի վարչապետության հարցում ՀՀԿ-ում իրականում այնքան էլ կոնսենսուս գոյություն չունի, և իրավիճակը բոլորովին հեռու է վճռված լինելուց:
Սակայն այստեղ, իհարկե, կոնսենսուսի բացակայության պարագայում կա մեկ այլ ուշագրավ հարց՝ իսկ ՀՀԿ-ում գոյություն ունի՞ Սերժ Սարգսյանի այլընտրանքի վերաբերյալ պատկերացում: Այսինքն, եթե որևէ թև կամ շերտ դեմ է Սարգսյանի վարչապետությանը, ապա այդ շերտերը ինքնաբերաբար կողմ են իրենց որևէ թեկնածուի՞, թե՞ նրանք դեմ են Սերժ Սարգսյանի շարունակությանը, սակայն յուրաքանչյուրն ունի նրա փոխարեն վարչապետի իր թեկնածուն:
Այլ կերպ ասած՝ խնդիրը հետևյալն է՝ Սերժ Սարգսյանի մրցակիցը կամ պոտենցիալ մրցակիցը ՀՀԿ-ում կոնկրետ ինչ-որ թեկնածո՞ւ է, թե՞ մրցակիցը պարզապես ՀՀԿ-ական տարբեր թևերի, այսպես ասած, շահախնդրությունն է, և նրանք պարզապես ցանկանում են, որ Սերժ Սարգսյանն իրենց լրացուցիչ մոտիվացնի՝ հավանության արժանանալու համար: Որովհետև եթե տեսականում ելնենք այն կանխավարկածից, որ Դավիթ Հարությունյանը ՀՀԿ-ում «սպիտակ ագռավ» չէ, իսկ այդպիսին լինելու դեպքում նա հազիվ թե հրապարակավ կասկածեր Սարգսյանի վարչապետությանը, ապա այստեղ մեկ կամ մի քանի այլընտրանքային թեկնածուների հարցը դառնում է առանցքային:
Եթե առանցքայինը Սերժ Սարգսյանին դեմ լինելն է, ոչ թե կոնկրետ այլընտրանքի կողմ լինելը, ապա այդ հանգամանքը Սերժ Սարգսյանը անկասկած կհաղթահարի առանց մեծ ջանքի: Հակառակ պարագայում, Դավիթ Հարությունյանը, կամա, թե ակամա, Սերժ Սարգսյանին խոստացել է բավականին դժվար պայքար հենց սեփական կուսակցությունում:
