Մամուլի ազգային ակումբի նախագահ Նարինե Մկրտչյանի կարծիքով՝ հայաստանյան լրատվամիջոցների զգալի մասը ռուսական քարոզչության ազդեցության տակ է. «Եթե մի համատեքստում նայենք՝ ռուսական քարոզչամեքենան իր մեդուզայի շոշափուկները տարածել է ամենուր, բայց որ ռուսական ալիքների հեռարձակումն այստեղ օր առաջ պետք է դադարեցնել՝ դա փաստ է»,- «Առաջին լրատվական»-ի հետ զրույցում նման տեսակետ հայտնեց Մամուլի ազգային ակումբի նախագահ Նարինե Մկրտչյանը։
Հարցին՝ արդյո՞ք այդ սահմանափակումն էլ ավելի ագրեսիվ չի դարձնի Ռուսաստանին, Նարինե Մկրտչյանն արձագանքեց.
«Քաղաքականության մեջ խելագարության կանխավարկածով չի կարելի առաջնորդվել»։
Մեր զրուցակիցն ընդգծում է՝ Հայաստանը ստորագրելով Եվրամիության հետ շրջանակային փաստաթուղթ, փորձ է անում այս կամ այն չափով «կտրել իր կապերը» Ռուսաստանից։ «Թե որքանով կհաջողվի այդ կախվածությունը թուլացնել՝ արդեն այլ իշխանությունների խնդիր է»,- ասաց նա։
Միևնույն ժամանակ Նարինե Մկրտչյանն ընդգծում է՝ շատ լուրջ ճանապարհ ունենք անցնելու. «Ռուսաստանին այստեղից դեռ ոչ ոք չի հեռացրել, բայց ես հույս ունեմ, որ Ռուսաստանի ժամանակը Հայաստանում կավարտվի»։
Արդյո՞ք շրջափակման մեջ գտնվող Հայաստանը կարող է կամուրջ լինել ԵԱՏՄ-ի և ԵՄ-ի միջև, հարցին ի պատասխան, Նարինե Մկրտչյանը պատասխանեց. «Դա մեր իշխանությունների կողմից տարածված միֆ է, այն ստեղծվել է, որպեսզի Ռուսաստանին չզայրացնենք, ստորագրելով այդ համաձայնագիրը։ Հայաստանը միշտ գտնվել է քաղաքական, քաղաքակրթական խաչմերուկում, բայց չենք կարող լինել կամուրջ։ Մենք չենք կարող կամուրջ լինել հետադիմության և առաջադիմության միջև, չենք կարող տոտալիտարիզմը կամրջել ժողովրդավարությանը, կոռուպցիայի առկայությունը՝ դրա չգոյությանը»։
Հարցազրույցն ամբողջությամբ՝ տեսանյութում։
