Վրացի երկու ուսանող շատ են հետաքրքրել NASA-ի հանձնաժողովին իրենց մշակած նախագծով, գրում է telegraf.com.ua-ն: Երիտասարդները ստեղծել են համակարգ, որը հնարավորություն է տալիս թթվածին արտադրել այլմոլորակային պայմաններում, օրինակ՝ Մարսի վրա:
ԱՄՆ օդանավորդության և տիեզերական տարածության ուսումնասիրման ազգային գործակալության գիտնականներն ամենայն լրջությամբ են մոտենում մշակումներին, որոնք ոչ հեռու ապագայում հնարավորություն կտան Մարսի հաջող գաղութացում իրականացնել: Ուստի ներկայացուցչական հանձնաժողովը հետաքրքրվել է թբիլիսցի ուսանողների նախագծով:
Նորարարությունը հիմնված է թթվածին արտադրելու ցիանոբակտերիաների որոշակի խմբի յուրահատուկ ունակության վրա: Ներկայումս գոյություն ունեցող տեսության համաձայն՝ այդ միկրոօրգանիզմներն են հիմք դարձել Երկրի մթնոլորտի կառուցվածքի փոփոխության և այլ օրգանիզմների առաջացման համար:
Ուսանողների մշակած համակարգը հնարավորություն է տալիս այդ ունակությունն օգտագործել արդյունաբերական ծավալներով: Մարսի գաղութացման համար այդ մշակումը շատ կարևոր է:
