Թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանի հետ զրուցել ենք Թուրքիայի նախագահ Էրդողանի վերջին հայտարարությունների շուրջ: Էրդողանը անդրադարձել է Հայաստանին՝ հայտարարելով՝ հայկական Սփյուռքի ճնշման տակ Երևանը համառորեն փակ է պահում Թուրքիայի հետ բարեկամության դռները, որի հետևանքով դուրս է մնացել էներգետիկ, առևտրային ու տրանսպորտային նախագծերից և շարունակելու է դուրս մնալ: Հարցին՝ արդյոք սա նշանակում է, որ մինչև 2018-ի ապրիլ հայ-թուրքական արձանագրությունների հետ կապված որևէ փոփոխություն չի լինի և Հայաստանը հետ կկանչի այն, Ռուբեն Մելքոնյանը նշել է, որ Էրդողանի հայտարարությունը ցույց է տալիս առնվազն երկու բան. «Նախ՝ նրա հռետորաբանության մեջ շարունակում է մնալ արխայիկ ոճը, այսինքն՝ հայկական Սփյուռքի ճնշումներ և այլն, այդ ոճը ընդունված էր կիրառել 90-ականների Թուրքիայի քաղաքական դաշտում, և 2017-ին խոսել 90-ականների ոճով, ճիշտ չէ»: Ըստ թուրքագետի՝ սա ցույց է տալիս, որ նրանց մտածողությունը չի փոխվել, նրանք համարում են, որ Հայաստանի տարատեսական քաղաքական քայլերը պայմանավորված են Սփյուռքով, ինչը իրենց կոմպլեքսների արտացոլումն է:
Երկրորդ՝ Էրդողանը հերթական անգամ հանդես է գալիս խտրական հայտարարություններով՝ իրենց ունեցած լծակները դիտարկելով որպես տարատեսակ խնդիրներ լուծելու, Հայաստանին ճնշելու և որպես պատանդ դիտարկելու համար:
Ռուբեն Մելքոնյանի կարծիքով՝ իր կուսակիցների և ներքին լսարանի մոտ Էրդողանը շարունակում է կայուն պահել ազգայնամոլության չափաբաժինը:
Հարցազրույցն ամբողջությամբ՝ տեսանյութում:
