Նախօրեին Երևանի «Նաիրի» մարզադաշտում տեղի ունեցավ Հայաստանի բարձրագույն խմբի առաջնության այս տարվա վերջին հանդիպումը: Երևանի «Արարատը» դրամատիկ պայքարում 2:3 հաշվով զիջեց «Բանանցին»: Մրցավարի ավելացրած 2-րդ րոպեին «Արարատին» հաջողվեց հաշիվը դարձնել 2:2, իսկ արդեն լրացուցիչ 4-րդ րոպեին 11 մետրանոց հարվածով Վալմերսոնը հաղթանակ պարգևեց «Բանացին»: Վերջին վայրկյաններին գլխավոր մրցավար Հենրիկ Նալբանդյանի՝ 11 մետրանոց նշանակելու որոշումը բնականաբար զայրացրեց թե՛ «Արարատի» ֆուտբոլիստներին և թե՛ մարզիչներին: Ինչու բնականաբար, քանզի տվյալ դրվագը խիստ վիճելի էր, և նույն հաջողությամբ Նալբանդյանը կարող էր չնշանակել 11 մետրանոց:
Ամփոփելով Հայաստանի բարձրագույն խմբի առաջնության առաջին կեսը՝ կարող ենք փաստել, որ այն տխուր էր և ինչ-որ տեղ՝ ամոթալի: 15 տուրերում չափից ավելի շատ են բողոքներն ու միջադեպերը՝ կապված հատկապես մրցավարության հետ: Քիչ չէին նաև տհաճ միջադեպերը, որոնք ուղեկցվեցին քաշքշուկներով և հայհոյանքներվ: Հիշենք, որ առաջնության 6-րդ տուրի «Արարատ»-«Գանձասար-Կապան» հանդիպումը ըստ էության անավարտ մնաց: Հանդիպման վերջնամասում «Արարատի» ավագ մարզիչ Արկադի Անդրեասյանը, այսպես ասած, ջղայնացել էր հանդիպման գլխավոր մրցավար Արտակ Սիմոնյանի վրա՝ վստահ լինելով, որ վերջինս անտեղի դեղին քարտ է ցույց տվել իր ֆուտբոլիստներից Արգիշտի Պետրոսյանին: Սիմոնյանը պահանջում էր, որ Անդրեասյանը լքի մարզիչների համար նախատեսված տեխնիկական գոտին՝ պնդելով, որ հակառակ դեպքում չի վերսկսվի հանդիպումը: Անդրեասյանը չհեռացավ, և Սիմոնյանը խաղավարտից 2 րոպե շուտ հնչեցրեց մրցավեճի վերջն ազդարարող սուլիչը: Նման պահվածքի համար Արկադի Անդրեասյանը ՀՖՖ-ի կողմից որակազրկվեց միանգամից երկու տարով:
«Արարատ»-«Գանձասար» հանդիպումից ընդամենը մեկ օր անց նույն «Միկա» մարզադաշտում տեղի ունեցավ հերթական խայտառակ միջադեպը: Հայաստանի առաջին խմբի առաջնության 6-րդ տուրի շրջանակներում միմյանց ծեծեցին «Արցախի» և «Լոռիի» ֆուտբոլիստները՝ հայհոյանքների տարափ հնչեցնելով միմյանց: Տեղի ունեցածը ոչ այլ ինչ էր, քան խուլիգանական «ռազբորկա»: Կրքերը թեժ են եղել նաև մարզադաշտի տրիբունայում: Մրցավարը ստիպված է եղել մի քանի ֆուտբոլիստների հեռացնել դաշտից:
Բարձրագույն խմբի առաջնության 11-րդ տուրը ևս նշանավորվեց բավական տգեղ միջադեպով: Գյումրիի քաղաքային մարզադաշտում գործող չեմպիոն «Ալաշկերտի» գլխավոր մարզիչ Աբրահամ Խաշմանյանը, արձագանքելով գյումրեցի երկրպագուների հայհոյանքներին, ինքն էր հնչեցրել հայհոյանք, ինչի հետևանքով «Շիրակ» ակումբի աշխատակիցներից մեկը հարվածել էր նրան: «Ալաշկերտ» ակումբի նախագահ Բագրատ Նավոյանը նշել էր, որ Խաշմանյանը պատասխանել է երկրպագուներին, քանզի նրան, այսպես ասած, մայր են հայհոյել: «Յուրաքանչյուր հայ տղամարդ իրավունք ունի նման իրավիճակում պատասխան տալու: Իրավունք չունեն՝ ուզում է երկրպագու լինի, ուզում է մարզիչ: Ինչ է նշանակում մարզչին մայր հայհոյել»,- ասել էր Նավոյանը: Ֆուտբոլի ֆեդերացիան Խաշմանյանին որակազրկեց 10 խաղով:
Այսօր Հայաստանի բարձրագույն խմբի առաջնությունում մասնակից 6 թիմերի մարզիչներից երկուսը՝ Խաշմանյանն ու Անդրեասյանը, իրենց թիմերի հանդիպումներին հետևում են տրիբունաներից: Չարդարացնելով այս մասնագետներին և չմեղադրելով ֆուտբոլի ֆեդերացիային՝ ամեն դեպքում կարծում ենք, որ 6 թիմ ունեցող առաջնության համար 2 մարզչի որակազրկումը բավական մտահոգիչ իրողություն է: Մեր առաջնության որակի մասին խոսելը, կարծում ենք, ավելորդ է: Առաջընթացի մասին կարելի կլինի խոսել միայն այն ժամանակ, երբ Բարձրագույն խմբի առաջնության հանդիպումների ժամանակ միջինը գոնե 500 մարդ ներկա գտնվի, իսկ տրանսֆերային պատուհանների ընթացքում գոնե 2-3 ֆուտբոլիստներ տեղափոխվեն արտասահմանյան կարգով ավելի բարձր թիմեր:
Խոսվում է, որ Հայաստանի գալիք առաջնությունում լուրջ փոփոխություններ են սպասվում: Մասնավորապես, եղան հրապարակումներ, որ ռուսաստանաբնակ գործարար Սամվել Կարապետյանը պատրաստվում է խոշոր ներդրումներ անել հայկական ֆուտբոլում և հիմնել երկու ֆուտբոլային ակումբ: Սպասում է, որ եկող տարի կունենանք 9-10 թիմ, որոնք պատրաստ կլինեն մասնակցել բարձրագույն խմբի առաջնությունը:
Բնական է, որ մրցակցությունը և մոտիվացիան անդունդից դուրս կբերեն ներկայիս առաջնությունը: Կնվազեն նաև միջադեպերն ու բողոքները, քանզի ֆուտբոլիստները և մարզիկներն ավելի հետաքրքիր զբաղմունք կունենան՝ ի դեմս նորմալ ֆուտբոլի:
Սպասելով լուրջ փոփոխությունների՝ հուսանք, որ ընթացիկ առաջնությունը կլինի վերջինը ձախողվածների ու ամոթալիների շարքից:
