«Հայաստան-ԵՄ համաձայնագրի ստորագրումը հույս է ներշնչում, որ կարող է Հայաստանում կոռուպցիայի դեմ պայքարում ինչ-որ բան փոխվել. ԳՐԵԿՈ-ի 18 հանձնարարականներից 7-ը միայն վերաբերում է դատական համակարգի բարեփոխումներին: Ես ինքս մեր դատական համակարգում չեմ տեսնում որևէ փոփոխություն, քանի դեռ գործադիր իշխանությունն ուղղակի ճնշում է դատավորներին, և դատական համակարգը կախված է գործադիրից»,- «Առաջին լրատվական»-ի հետ զրույցում նշեց իրավապաշտպան Ժաննա Ալեքսանյանը՝ անդրադառնալով Եվրոպայի խորհրդի Կոռուպցիայի դեմ պայքարի պետությունների խմբի (GRECO) կողմից Հայաստանի վերաբերյալ ներկայացված առաջարկություններին։
Իրավապաշտպանի խոսքով՝ առանց քաղաքական կամքի պարզ է, որ, օրինակ, Վճռաբեկ դատարանի նախագահ Արման Մկրտումյանը կշարունակի մնալ այդ պաշտոնին՝ միայն ՀՀ նախագահի ցանկությամբ։
«Դատական համակարգի ամբողջ բողոքը կապված է վճռաբեկ դատարանի հետ, և դա շատ մեծ խոչընդոտ է, բայց տեսնում ենք, որ իշխանության ղեկավարը չի դրսևորում այդ քաղաքական կամքը՝ Արման Մկրտումյանին փոխելու»,- ասաց Ալեքսանյանն ու հավելեց. «Այս իշխանությունները ճահիճ են, պետք է նոր մարդիկ գան, նոր սերունդ, որը մերժում է կոռուպցիան, մերժում է անարդարությունը, բայց տեսնում ենք, որ բռնի ձևով պահվում է այս իշխանությունը»։
Մանրամասները՝ տեսանյութում։
