Ֆրանսիայի տնտեսական հետազոտությունների և վիճակագրության ազգային ինստիտուտում կազմվել է միջին ֆրանսիացու «դիմանկարը»՝ գրում է rfi.fr առցանց կայքը:
Միջին վիճակագրական ֆրանսիացիների մեծ մասը բարձրագույն կրթություն չունի, սակայն ունի մոտ 90 քառ. մետր անշարժ գույքի սեփականություն, ընդ որում՝ նա համարում է, որ գտնվում է դժվարին ֆինանսական ճգնաժամային վիճակում:
«Միջին» են համարել այն ֆրանսիացիներին, որոնց ամսական շահույթը կազմում է 1510-1850 եվրո: Արդյունքում, միջին խավին են դասվել 11 մլն 600 հազար մարդ: Նրանցից յուրաքանչյուր չորրորդը միայն հիմնական դպրոց է ավարտել, 28 տոկոսն ունի միջին մասնագիտական կրթություն և միայն 21 տոկոսն ունի բարձրագույն կրթություն:
Նրանցից շատերը մտահոգություն ունեն իրենց սոցիալական կարգավիճակի անկման վերաբերյալ և վախենում են՝ չկարողանան ապահովել արժանապատիվ ծերություն: Այնուամենայնիվ, նրանց 73 տոկոսը գոհ է իր կարգավիճակից:
