Նոյեմբերի 5-ին կայացած ՏԻՄ ընտրությունների մրցապայքարից դուրս մնացած Ալավերդու քաղաքապետ Կարեն Փարեմուզյանը, ինչպես հայտնի է, նոր պաշտոն է ստացել։ Նա նշանակվել է «Գազպրոմ Արմենիա» ընկերության Լոռու մասնաճյուղի Թումանյանի տեղամասի պետ:
«Ես չեմ ուզում ձեր ոչ մի հարցին պատասխանել։ Երբ որ դուք ուսումնասիրեք մարդու անցած ճանապարհը և նոր թերթերով հայտարարություն տաք, գուցե խոսեի ձեզ հետ։ Բայց եթե մարդու անցած ճանապարհը չեք ուսումնասիրում, էլ ինչ խոսեմ ձեզ հետ»,- ասաց Փարեմուզյանը և անջատեց հեռախոսը՝ անպատասխան թողնելով մեր այն հարցը, թե ինչ դերակատարություն է ունեցել Լոռու մարզպետ Արթուր Նալբանդյանը իր նշանակման հարցում։
Նշենք, սակայն, որ Կարեն Փարեմուզյանի անցած ճանապարհը ուսումնասիրելուց բնավ էլ ոչ մի բան հայտնի չի դառնում։ Պարզ չի դառնում, թե «Գազպրոմ Արմենիայում» նրա փորձառությունը որտեղից է գալիս։ Նա մասնագիտությամբ էլեկտրամեխանիկ է։
Ներկայացնում ենք Կարեն Փարեմուզյանի կենսագրությունը, որը զետեղվածէ Վիկիպեդիայի էջում։
Կարեն Փարեմուզյանը ծնվել է 1971 թվականի հունվարի 16-ին Ալավերդի քաղաքում։ 1977-1987 թվականներին սովորել է Ալավերդու №5 միջնակարգ դպրոցում, իսկ 1977-1987 թվականներին՝ Երևանի Կ. Մարքսի անվան պոլիտեխնիկական ինստիտուտում և ստացել ինժեներ-էլեկտրամեխանիկի մասնագիտություն։
1992-1995 թվականներին որպես տեսուչ է աշխատել Հայաստանի մաքսային ծառայության Այրումի մաքսակետում, այնուհետև որպես տեխնոլոգ՝ աշխատանքի է անցել Ալավերդու լեռնամետալուրգիական կոմբինատի մեխանիկական արտադրամասում։ Մեկ տարի անց՝ 1996 թվականից, պաշտոնավարել է մեխանիկական նորոգման արտադրամասի պետի տեղակալի պաշտոնում։ 2004-2008 թվականներին ղեկավարել է նույն կոմբինատի մեխանիկական արտադրամասը։
2008-2011 թվականներին զբաղվել է մասնավոր բիզնեսով, այնուհետև՝ մինչև 2015 թվականի սեպտեմբերի 15-ը, աշխատել է ՀԿԵ ՓԲԸ-ում որպես Սանահինի մեխանիզացված գծային ուղեմասի պետ։
Ինչ վերաբերում է մարզպետի միջնորդությանը, ապա Արթուր Նալբանդյանը մեզ հետ զրույցում շատ կարճ արձագանքեց իր մասնակցությանը Փարեմուզյանի նշանակման հարցում։ «Դա անհեթեթություն է։ «Գազպրոմ Արմենիան» մասնավոր հիմնարկ է, և ես մասնավոր հիմնարկներում միջնորդությամբ չեմ զբաղվում»,- ասաց Նալբանդյանը։
