«Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագիծը հիմնականում երեք նպատակ ունի՝ ընտանիքում բռնության կանխարգելում, տուժածների իրավունքների պաշտպանություն և ընտանիքում համերաշխության վերականգնում, այս մասին այսօր ԱԺ պետական-իրավական հարցերի մշտական հանձնաժողովում հայտարարեց Արդարադատության փոխնախարար Վիգեն Քոչարյանը՝ ներկայացնելով վիճահարույց նախագիծը:
«Ծառուկյան» խմբակցության պատգամավոր Գևորգ Պետրոսյանի համար տարօրինակ է նախագծի վերնագրի այս մասը՝ ընտանեկան համերաշխության վերականգնման մասին օրենք: Ըստ նրա, կարող է ընտանիքում լավ տրամադրության օրենք էլ բերեն: Նրա խոսքով՝ «Ընտանեկան համերաշխության, երջանկության, դրանց համար լավագույն միջոցն այն է, որ պետությունը ընտանիքներին մարդավայել կյանքով ապահովի»:
Նա նշեց, որ եթերով ամեն օր քարոզում են բռնություն, բռնաբարություն, մարդասպանություն, դա՞ է ընտանեկան բռնությունը կանխարգելելու լավագույն միջոցը: Հանձնաժողովի նախագահ Հրայր Թովմասյանը համաձայնեց, որ եթերում շատ վատ տեսարաններ են ցուցադրում՝ ինչպես են մազերից քարշ տալով կնոջը տանում, երեխաները սեղանի տակ դողում, ատրճանակ և այլն: Գևորգ Պետրոսանն էլ հեգնեց, թե ինչ են ցուցադրում սերիալներում՝ «80 տարեկան կնիկ ա, հղի ա»:
